Óz balańyzdaı qarańyzdar - Sáýle Aıtpaeva kásipkerlerge úndeý joldady

NUR-SULTAN. QazAqparat - QR Bala quqyqtary jónindegi ýákil Sáýle Aıtpaeva balalarǵa qyzmet kórsetetin bıznes nysandarynyń ıelerine úndeý tastady, dep habarlaıdy QazAqparat tilshisi.

«Meniń bul sózim elimizdegi barlyq kásipkerlerge arnalady. Sizder de biz sııaqty ata-anasyzdar. Sizderdiń de kún saıyn aldaryńyzǵa kelip, qyzmetterińizdi paıdalanatyn jetkinshekter sııaqty óz balalaryńyz bar. Sondyqtan, búldirshinderdiń bos ýaqytyn uıymdastyrý kezinde quqyǵyn qorǵaýǵa basa mán berýlerińizdi suraımyn. Úıirme bolsyn, sporttyq shara bolsyn, kez kelgen qyzmet túrinde balalarǵa óz balańyzdaı qarasańyzdar eken», - degen ombýdsmen balanyń barlyq quqyqtary zańmen qorǵalatynyn atady.

Jazǵy demalys bastalǵan tusta balalarǵa kórsetiletin qyzmet túrlerine suranystyń artatynyn eske salǵan ýákil kásipkerler qaýymyn nysandarda bala qaýipsizdigine qatysty barlyq reglamentti qatań saqtaýǵa shaqyrdy.

«Ulttyq kásipkerler palatasy ol talaptardyń barlyǵyn sizderge únparaq retinde taratty. Sizderdiń sheshimderińiz ben áreketterińiz balardyń ómirimen tikeleı baılanysty. Sondyqtan ár iste, árbir sheshimdi qabyldaý barysynda muqııat bolýdy suraımyn», - dedi Sáýle Aıtpaeva.