Óz balalaryn óltirdi degen aıyppen 20 jyl túrmede otyrǵan aýstralııalyq áıel aqtaldy
Sot qateligi saldarynan Ketlın Folbıgg 20 jyl qamaýda boldy. Endi úkimniń kúshi joıyldy, áıel ótemaqy talap etýge quqyly. Kazinform bul týraly Euronews agenttigine silteme jasap habarlaıdy.
Aýstralııalyq sot 20 jyl buryn óziniń 4 balasyn óltirdi dep aıyptaǵan Ketlın Folbıggtiń barlyq úkiminiń kúshin joıdy. Ol kezde janama aıǵaqtar, onyń ishinde áıeldiń kúndeligi dálel retinde paıdalanylǵan edi.
Folbıgg jıyrma jylyn túrmede ótkizdi. Ol jarty jyl buryn ǵana, genetıkter men ımmýnologtar balalar tabıǵı sebepterden qaıtys boldy degen qorytyndyǵa kelgennen keıin bosatyldy. Jańa sot saraptamasy kezinde júrek toqtaýy men epılepsııany týdyrýy múmkin gen mýtatsııasy anyqtaldy.
Úkimdi joıý Folbıggke zańsyz qamaýda bolǵany úshin ótemaqy talap etýge múmkindik beredi.
2003 jyly ony «Aýstralııadaǵy eń zulym qanisher» dep atady. Prokýrorlar Folbıgg balalaryn toǵyz aptadan úsh jasqa deıingi aralyqta býyndyryp óltirdi dep málimdedi. Biraq ol únemi aıyptaýlardy joqqa shyǵaryp, árqaısysy tabıǵı sebepten qaıtys bolǵanyn aıtýdan tanbady.
Birinshi bolyp Folbıggtiń týǵanyna 19 kún bolǵan uly qaıtys boldy. Birde tún ishinde áıel ájethanaǵa barǵysy kelip oıanady. Balasyn qarap shyǵyp, onyń dem almaı jatqanyn túsingen.
Sodan keıin ol segiz aılyq Patrıkten aıyryldy. Keıinirek toǵyz aılyq Sara men 18 aılyq Lora da ómirden ótedi.
Folbıgg únemi kinásiz ekenin aıtatyn, biraq ıspanııalyq ǵalymdardyń biri oǵan kómekteskenge deıin onyń oqıǵasyna eshkim senbedi.
«Ol óz balalaryn óltirdi degen oıdyń esh dáleli joq edi. Jalǵyz derektiń ózi janama boldy – balalardy óli tapqan áıeldiń ózi», - dedi zertteýshi Vınýesa.
Beısenbi kúni sot zaly shapalaq soǵyp, Folbıgg jyldar boıy kútken sózin estip eńirep jylady.
Sot zalynyń syrtynda ol jaqtastaryna, advokattar men ǵalymdarǵa, ásirese tergeýdi basqarǵan ıspanııalyq Karol Garsııa Vınýeske atyn jaladan tazartqany úshin alǵys aıtty.
