Óz áıelin benzın quıyp órtep jibergen Q. Sádýov kinásin moıyndamady
ASTANA. QazAqparat - Astanalyq mektepterdiń birinde muǵalim bolyp istegen áıelin benzın quıyp órtep jibergen dep aıyptalǵan azamat kinásin moıyndamady, dep habarlaıdy «Astana» arnasy.
Qoǵamdy dúr silkindirgen Qanat Sádýovtiń isi boıynsha aldyn-ala sot otyrysy ótti. Qanat Sádýovke Qylmystyq kodeksiniń 99-baby, ekinshi bóliminiń besinshi tarmaǵy boıynsha, ıaǵnı «asqan qatygezdikpen adam óltirdi» degen aıyp taǵylýda. Atyshýly isti Astana aýdanaralyq mamandandyrylǵan sot tóraǵasy Erbol Rahymbekov qaraıdy. Aıyptalýshy Sádýov alǵashqy tyńdaýda alqa bıler tóraǵalyǵynan da bas tartty. Al onyń qorǵaýshysy Serik Nurlybaev qorǵalýshysynyń búgingi málimdemesin «óz erki» dep baǵalady.
«Óz pikiri. Ol bul qylmysty jasamaǵandyǵyna senimdi. Endigi protsess onyń sharýasy emes. Eshkim óziniń kinásizdigin dáleldeýge mindetti emes», - dedi Qanat Sádýovtyń advokaty Serik Nurlybaev.
Іs boıynsha negizgi sot otyrysy 27 qarashaǵa belgilendi. Eske salsaq, jantúrshigerlik oqıǵa ústimizdegi jyldyń mamyr aıynda boldy. Kúdikti Qanat Sádýov Astanadaǵy №25 mektepte jumys istegen áıelin syrtqa shyǵaryp, oqýshylarynyń kózinshe soqqyǵa jyǵyp, keıin órtep jibergen-di. Denesiniń 70 paıyzyn kúıik shalǵan muǵalim aýrýhanada bir aptadaı jatyp, aqyry es jımastan kóz jumdy. Al oqıǵa ornynan qashyp qutylǵan Sádýovtiń ózi araǵa tórt aı salyp qyrkúıektiń 14 kúni Astana mańyndaǵy Qabanbaı batyr aýylynda turatyn týystarynyń jertólesinde jasyrynyp jatqan jerinen ustaldy.
