Óz atyna artyq eńbekaqy aýdaryp, memlekettiń 9,3 mln. teńge qarjysyn urlaǵan býhgalter 6 jylǵa sottaldy

Bul aqparatty QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen habarlady.

Shyǵys Qazaqstan oblystyq ekonomıkalyq qylmysqa jáne sybaılas jemqorlyqqa qarsy kúres departamenti «Semeı qalasy №2 qalalyq aýrýhanasy» memlekettik mekemesiniń býhgalteri L.Mılıanovıchke qatysty qylmystyq is­ti tergeýdi aıaqtady. Ol 2005 jylǵy qańtar men 2009 jylǵy shilde aralyǵynda óziniń qyzmettik babyn paıdalana otyryp, eńbekaqy tóleý jóninde jalǵan jınaq vedomstvolaryn jasaǵan. Sol arqyly óziniń atyna artyq eńbekaqy aýdaryp, memlekettiń jalpy somasy 9,3 mln. teńge mólsherindegi qarjysyn urlaǵan.

«Semeı qalasy №2 sotynyń úkimimen L.Mılıanovıch QR QK 176-baby 3-bóliginiń «b» tarmaǵy (senip tapsyrylǵan bótenniń múlkin ıelený jáne ysyrap etý) boıynsha kináli dep tanylyp, 3 jylǵa memlekettik mekemeler men kásiporyndarda qarjy-ekonomıkalyq laýazymda bolý quqyǵynan aıyryldy jáne múlki tárkilenip, 6 jylǵa bas bostandyǵynan aıyrý jazasyna kesildi», - delingen vedomstvo aqparatynda.