Óz áriptesin atyp óltirgen polıtseı sottaldy
ALMATY. QazAqparat - Almatyda áriptesin basynan atyp óltirgen Azamat Beristemov 11 jyl 3 aıǵa sottaldy, dep habarlaıdy QazAqparat tilshisi.
Mamandandyrylǵan aýdanaralyq sotynyń sýdıasy ınspektor Azamat Beristemovti 11 jyl 3 aıǵa bas bostandyǵynan aıyrý týraly úkim shyǵardy.
Eske salaıyq, 2018 jyly qyrkúıek aıynyń sońyna qaraı Almatyda Jergilikti polıtsııa ınspektory Azamat Beristemov óziniń áriptesi Sábıt Beglanulyn atyp tastaǵan bolatyn. Jaraqat alǵan Sábıt Beglanuly sol kúni, túngi saǵat 22.00-de aýrýhanada kóz jumdy. Keıin tártip saqshylarynyń bir-birine týys ekendigi anyqtaldy. Atalǵan oqıǵaǵa baılanysty QR Іshki ister mınıstri Qalmuhanbet Qasymov pikir bildirgen bolatyn.
«Kúdikti kezekshilikke kelip, qarýdy qabyldaǵan. Keıin garajdan avtokólikti alýǵa shyqqan kezde, ol kúıeý balasymen jolyqqan. Kóz jumǵan qyzmetker kezekshiligin tapsyrýǵa kelgen. Sońǵy alty aı merzimde ol otbasymen birge turmaǵan kórinedi. Keshqurym qyzmetkerler kezdesip qalǵan kezde janjal týyndap, sonyń saldarynan birinshisi qarýdan oq atqan», - dep naqtylady vedomstvo basshysy.
Óziniń áriptesi, ári kúıeý balasy Sábıt Beglanulyn atyp óltirgen ınspektor Azamat Beristemov osydan bir jyldaı ýaqyt buryn ákesinen aıyrylǵan. 2018 jyly 31 naýryzda Taldyqorǵan oblystyq qorǵanys departamentiniń basshysy Berdibek Beristemovti óziniń orynbasary kabınetinde atyp óltirgen bolatyn.
«Bizdegi qyzmetkerlerdiń barlyǵy jyl basynda testileýden ótedi. Beristemov te ótti. Onyń ákesi oqqa ushqan soń, biz ony mamyrda taǵy testileýden ótkizdik. Áńgimelestik. Testileý nátıjesinde onyń deni saý bolyp shyqty. Ol psıhologııalyq turǵydan turaqty, kúızeliske tózimdi kórindi. Ol tym senimdi, ózin-ózi óte joǵary baǵalaıtyn. Tik minezdi, qyrsyqtyǵy da bar edi. Sonymen qatar, adamdarmen jaqsy til tabysatyn, dostary da kóp edi», - dedi Albına Saǵatbaev.
Al marqum bolǵan Sábıt Beglanuly basqa bólimshede qyzmet etken. Ol da psıhologııalyq táýekel tobynda bolǵan.
