Oıynshyqtar hıkaıasy: Tom Henks pen Kıaný Rıvz qazaqsha sóıledi

NUR-SULTAN. QazAqparat - «Ózińnen basta» jobasy aıasynda qazaq tiline dýblıajdalǵan 30-shy fılm jaryqqa shyqqaly jatyr. «Istorııa ıgrýshek» / «Oıynshyqtar hıkaıasy» anımatsııalyq fılmi osy jyldyń 20 maýsymynda jappaı prokatqa jol tartady, dep habarlaıdy QazAqparat tilshisi «Bolashaq» korporatıvtik qoryna silteme jasap.

Anımatsııalyq fılm «Bolashaq» korporatıvtik qory jáne «Meloman» kompanııasynyń bastamasymen «Ózińnen basta» jobasy aıasynda dýblıajdalǵan. Anımatsııa astronavt Bazz, kovboı Výdı, ıt Slınkı, tıranozavr Rekstiń qyzyqty oqıǵalary týraly baıan etedi.

«Dýblıaj kastıngine Nur-Sultan men Almatydan 50-den astam akter qatysyp, fılmniń basty úsh saýndtregin belgili qazaqstandyq ánshi oryndady. Qazaq tilindegi úsh saýndtrektiń ekeýi Itunes qosymshasyna shyǵady. Alǵash ret fılmge arnalǵan ázilderdi qazaqstandyq Kóńildi tapqyrlar klýby beıimdedi. Anımatsııalyq trılogııadan shyqqan debıýttik fılm 1995 jyly úlken ekranǵa shyqqan. «Oıynshyqtar hıkaıasy - 4» alǵash ret qazaq tiline dýblıajdaldy. Onda Tom Henks, Ennı Potts, Tım Allen, Krıstına Hendrıks, Kıaný Rıvz jáne Gollıvýdtyń basqa da akterleri qazaq tilinde sóıleıdi», - delingen qordyń habarlamasynda.

Qazaq tilindegi dýblıaj rejısseri - Nazerke Lespekqyzy bolsa, aýdarmashy - Ásel Mamyrova, mátinderdi salýshy - Gúljan Saýyrtaeva.

«Ózińnen basta» - gollıvýdtyq fılmderdi qazaq tiline kórkemdik dýblıajdaý jobasy. 2011 jyldan beri «Bolashaq» korporatıvtik qory jáne «Meloman» kompanııasynyń bastamasymen júzege asyp keledi. Áleýmettik joba, sondyqtan kommertsııalyq maqsatty kózdemeıdi. Jobanyń arqasynda búginde 100-den astam otandyq akterler «Walt Disney Pictures» daýystyq bazasynda tur. Qazaq tili «Walt Disney» kompanııasynyń tarıhynda túrik tilinen keıin 39-shy jáne «Sony Pictures» úshin - 7-shi orynǵa jaıǵasty. Shyǵys Eýropa men TMD elderi úshin shyǵarylatyn Blu-Ray-de kórý úshin qoljetimdi gollıvýdtyq fılmderdiń 7 negizgi tilderine kirdi», - delingen habarlamada.