Oıynqumarlyq ýshyǵyp tur: Bás tigý men qumar oıyndar bir jylda 8,5 ese kóbeıgen

ASTANA. QazAqparat – 2022 jyldyń qańtar-qyrkúıeginde elimizde qumar oıyndar men bás tigý uıymdastyrý qyzmetteriniń kólemi 456,2 mlrd teńgeni qurady. Bul 2021 jyldyń dál osyndaı kezeńimen salystyrǵanda 8,5 ese joǵary, dep habarlaıdy QazAqparat tilshisi.

Energyprom portalynyń málimetinshe, qumar oıyndar men bás tigý uıymdastyrý qyzmetteriniń kólemi jyljymaıtyn múlik operatsııalary, sáýlet, ınjerelik izdenister,tehnıkalyq jáne saraptamalyq synaqtar, sonymen qatar kompıýterlik baǵdarlama jasaý jáne konsýltatsııalyq qyzmetterden keıingi orynda tur.

Ótken jyldyń 9 aıynda sektordaǵy qyzmetterdiń basym bóligi orta kompanııalarǵa tıesili – 276,4 mlrd teńge.

Odan keıingi orynda shaǵyn (163,1 mlrd teńge) jáne iri kásiporyndar (16,7 mlrd teńge) tur. Al jeke kásipkerlerge tek 9,9 mln teńge ǵana tıesili.

Aıta keterligi, 2021 jyly qyzmetterdiń eń basym bóligi shaǵyn kompanııalarǵa (38,1 mlrd teńge), odan keıin iri (9,9 mlrd teńge) jáne orta kompanııalarǵa (5,8 mlrd teńge) tıesili bolǵan edi.

Foto: i.sunhome.ru