Oıynhanalardyń ornyn basqan býkmeker keńseleri qoǵamǵa úlken qaýip týǵyzyp tur
ASTANA. QazAqparat - Oıynhanalardyń ornyn basqan býkmeker keńseleri qoǵamǵa zor qaýip týǵyzyp tur. Búgin Májiliste oıyn bıznesi máselelerine arnalǵan zań jobasynyń tanystyrylymy barysynda QR Sport jáne dene shynyqtyrý agenttiginiń tóraǵasy Tastanbek Esentaev osylaı málim etti.
«2000-shy jyldary elimizde oıyn avtomattary kez kelgen jerde kedergisiz jumys istep, keıbir qalalarda olardyń sany birneshe júzge jetken bolatyn. Keıinnen «Oıyn bıznesi týraly» jańa Zań qabyldanyp, bul sala biraz retke keldi. Degenmen, qazirgi kúni «oıynqumarlar» úshin oıynhananyń ornyn basqan býkmeker keńseleri sanynyń kúrt artýy qoǵamǵa zor qaýip týǵyzyp otyr», - deıdi agenttik basshysy Tastanbek Esentaev. Onyń aıtýynsha, Elbasynyń ózi Astana qalasynda 500-ge jýyq býkmeker keńsesi bar ekenine, olardyń shapshań qanat jaıyp kele jatqanyna nazar aýdarǵan bolatyn. «Shyndyǵynda, qazirgi tańda jastarymyz arnaıy zaldarǵa baryp, sportpen aınalasqanan góri, altyn ýaqyttaryn osyndaı oryndarda ótkizetini ókinishti. Tez baıýǵa degen qumarlyq eń aldymen kirisi tómen adamdardy, sondaı-aq jastardy baýrap alýda. Psıhologtar álemde qumar oıyndaryna táýeldilik esirtkige táýeldilik sekildi tez beleń alatynyn aıtady. Bul ulttyq deńgeıdegi qasiret, munyń artynda óz-ózine qol jumsaýǵa, qaryzyn tóleý úshin otbasynyń, ata-ananyń dúnıe-múlkin satýǵa, keıbir jaǵdaıda qylmystyq jolǵa túsýge ákeletin úlken qaýip tur», - deıdi agenttik basshysy. Soǵan oraı, T. Esentaev keri qubylysty joıýdy qazir qolǵa alýdy, sol úshin zań júzinde tıisti ózgertýdi engizý qajettigin alǵa tartady.
