Oıynhana, býkmekerlik keńse, totalızatorlardyń turǵyn úı ǵımaratynda jumys isteýine tyıym salynbaq
ASTANA. QazAqparat - Búgin Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysy bolyp ótti. Onda «Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» zań jobasy talqylandy.
Zań jobasy elimizdegi oıyn bıznesi salasyndaǵy zań normalaryn jetildirýdi kózdeıdi. Munda oıyn bıznesi týraly zańnamany aınalyp ótýge múmkindik beretin alshaqtyqtar men qaıshylyqtardy joıý sharalaryn qarastyrady. Sonymen qatar, ınternet-kazıno qyzmetine, onyń ishinde Qazaqstan aýmaǵyndaǵy sheteldik ınternet-kazıno qyzmetine tyıym salý belgilenedi. Budan bólek, oıyn bıznesi salasynda lıtsenzııa alý kezinde ótinish berýshilerdiń talaptaryn qatańdatý qarastyrylady.
Sonymen qatar, oıyn bıznesi salasyna salynatyn salyq mólsheri arta túsedi. Atap aıtqanda, joba boıynsha býkmekerlik keńse jáne totalızator kassalarynan alynatyn salyq 75 aılyq eseptik kórsetkishten (138 900 teńge) 150 aılyq eseptik kórsetkishke deıin (277 800 teńge deıin) ulǵaıatyn bolady. Al býkmeker keńsesi men totalızatordyń elektrondyq kassasyna salynatyn salyq 2000 aılyq eseptik kórsetkishke deıin (3 mln. 704 myń teńge) artady. Bul rette elektrondyq kassaǵa salyqty arttyrý negizinen ony paıdalanýshylardyń kóptigine qaraı oryn alyp otyr. Máselen, orta eseppen alǵanda Internet-resýrs arqyly bás tigýge tirkelgen qatysýshylardyń sany 200 myń adamǵa jetedi ári olardyń 50 paıyzy turaqty qatysýshylar bolyp tabylady.
Budan bólek, oıyn mekemelerin, býkmeker keńsesi kassalaryn jáne totalızatorlardy turǵyn úı ǵımarattaryna ornalastyrýǵa tyıym salynady.
Zań jobasy palatanyń aldaǵy ýaqytta ótetin jalpy otyrysyna shyǵarylady.
