Oıyn tizginin óz qolymyzda ustap, jeńiske jetýge tyrysamyz - V. Vaıss, «Qaırat» komandasynyń jattyqtyrýshysy
ALMATY. QazAqparat- Keshe Almatydaǵy Ortalyq stadıonnyń konferents-zalynda «Qaırat» - «Esberg» komandalary arasynda Eýropa lıgasynyń ekinshi kvalıfıkatsııalyq raýndy aıasyndaǵy kezdesýine arnalǵan baspasóz máslıhaty ótti.
Eń aldymen jýrnalıster aldyna danııalyq komandanyń jattyqtyrýshysy Nıls Frederıksen men komanda kapıtany Hans Henrık Andreasen shyqty.
«Jolǵa uzaq ýaqyt ketti. Biraq abyroı bolǵanda eshqandaı qıyndyq týyndaǵan joq. Almatyǵa tańerteń jettik. Jaqsylap demaldyq. Qazir jattyǵyp jatyrmyz. Jigitter oıynǵa saqadaı daıyn. Erteńgi oıyndy asyǵa kútemiz. Jalpy, komandada azdaǵan ózgeris oryn aldy. Ótken jylǵy quramnyń eki oıynshysyn sattyq. Endi, qalaı bolǵanda da árbir oıynnyń óz qıyndyǵy bolady ǵoı. Biraq biz soǵan qaramastan jeńiske jetýge tyrysamyz» - dedi óz sózinde Nıls Frederıksen.
Óz kezeginde komanda kapıtany Almatyda kúnniń tym ystyq ekendigine nazar aýdardy.
«Danııaǵa qaraǵanda Almatyda kún ystyq eken. Biraq bul bizdiń oıynymyzǵa áser ete qoımas dep oılaımyn. Muny endi erteńgi ýaqyt kórsetedi. Al Qazaqstannyń úlken memleket ekenin osy jaqqa ushyp kele jatyp bir-aq bildik! Onyń ústine men Qazaqstan týraly «Astana» velokomandasynan basqa eshteńe bilmeıdi ekenmin», - dep aǵynan jaryldy Hans Henrık Andreasen.
Óz kezeginde jýrnalıster aldyna shyqqan «Qaırat» komandasynyń jattyqtyrýshysy Vladımır Vaıss komandanyń oıynǵa jaqsy daıyndyqpen kelgenin jetkizdi.
«Qarsylasymyz myqty komanda. Myqty chempıonattyń beldi klýby. Ótken jyly Eýropa lıgasynda jaqsy óner kórsetip, jurtshylyqty tánti etken. Biraq bul fýtbol ǵoı. Ár komandanyń jeńiske jetýge múmkindigi bar. ıAǵnı, elý de elý. Keshe qarsylasymyzdyń oıyndaryna qatysty beınetaspalardy kórip, saraptama jasadyq. Oıynshylarymyzǵa óz mindetterin táp t ishtep túsindirdik. Jigitterdiń daıyndyǵy jaqsy. Erteń jaqsy oıyndy kútemiz. Oıyn tizginin óz qolymyzda ustap, qalaıda jeńiske jetýge tyrysamyz», - dedi Vladımır Vaıss.
Komanda kapıtany Samat Smaqov komandanyń kóńil-kúıi kóterińki ekendigin bildirdi.
«Bizdiń kezekti qarsylasymyz shynynda da myqty komanda. Keshe jigitterdiń barlyǵyna óz pozıtsııalaryna qatysty beınekórsetilimder taratyldy. Mindetteri túsindirildi. Endi úıde oınap jatyrmyz ǵoı. Qolymyzdan kelgenniń barlyǵyn jasaımyz. Jankúıerlerdiń senimin aqtaýǵa bar kúshimizdi salamyz» - dedi komanda kapıtany.
Esterińizge sala keteıik, oıyn búgin Almaty qalasynyń Ortalyq stadıonynda keshki saǵat 20:00-de bastalady.
Qarymta kezdesý 24 shildede Danııada ótedi.
