Oıyn-saýyq oryndarynda ustalǵan eki jasóspirimniń ata-anasy jaýapqa tartyldy - Astana qalasy ІІD
ASTANA. Qyrkúıektiń 14-i. QazAqparat /Arman Asqarov/ - Túngi ýaqytta qalanyń oıyn-saýyq oryndarynda ustalǵan eki jasóspirimniń ata-anasy jaýapqa tartylyp otyr. Bul týraly búgin Іshki ister departamentiniń Esirtki bıznesine qarsy kúres basqarmasynyń bastyǵy Aıasyn Baıdildaev málim etti, dep habarlaıdy QazAqparat.
Onyń aıtýynsha, qyrkúıektiń 10-11 kúnderi júrgizilgen arnaıy reıd barysynda "Neft" túngi klýby men "Stavka KZ" kompıýterlik klýbynda kámelettik jasqa tolmaǵan eki jas jetkinshek ustalyp, olarǵa qatysty ákimshilik hattama toltyryldy. «Osyǵan baılanysty olardyń ata-anasy Ákimshilik quqyq buzýshylyq kodeksine sáıkes jaýapqa tartylyp otyr», - deıdi A.Baıdildaev. Sondaı-aq oıyn-saýyq oryndarynyń ıeleri 5-10 aılyq eseptik kórsetkish kóleminde aıyppul tóleıtin bolady.
