Oıyn bıznesinen túsken zańsyz tabys 220 mln.teńgeni qurady -Qarjy polıtsııasy
ASTANA. Shildeniń 15-i. QazAqparat /Rýslan Ǵabbasov/ - Jyldyń basynan qarjy polıtsııasy organdarymen zańsyz oıyn bıznesi salasynda 22 qylmystyq is qozǵaldy.
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili (qarjy polıtsııasy) Murat Jumanbaı málim etti.
«Jyldyń basynan qarjy polıtsııasy organdarymen zańsyz oıyn bıznesi salasynda 22 qylmystyq is qozǵaldy. Bul ótken jyldyń osy kezeńindegi kórsetkishinen 20 paıyzǵa artyq. 17 qylmystyq is sotqa jiberildi, 7 adam sottaldy»,- dedi resmı ókil.
M. Jumanbaıdyń sózine qaraǵanda, júrgizilgen tekserister nátıjesinde 142 astyrtyn oıyn mekemesiniń qyzmeti áshkerelendi. Zańsyz oıyn aınalymynan 35 mln.teńge, 1039 oıyn avtomaty, 34 rýletka jáne karta oıynyna arnalǵan 56 stol tárkilendi.
«Qarjy polıtsııasynyń málimeti boıynsha, oıyn bıznesinen túsken zańsyz tabys 220 mln.teńgeni qurady»,- dedi ol.
Aıta keteıik, zańnamaǵa sáıkes kazıno men oıyn avtomattarynyń zaldary Almaty oblysynda Qapshaǵaı sý qoımasynyń jaǵalaýynda jáne Aqmola oblysynyń Býrabaı aýdanynyń aýmaǵynda ǵana ornalastyrylýy tıis.
