Oıyn bıznesine arnalǵan zań qabyldandy - Parlament
ASTANA. QazAqparat - Búgin Parlament Cenatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda qaralyp, qujat qabyldandy.
Qujat elimizdegi oıyn bıznesi salasyndaǵy zań normalaryn jetildirýdi kózdeıdi. Munda oıyn bıznesi týraly zańnamany aınalyp ótýge múmkindik beretin alshaqtyqtar men qaıshylyqtardy joıý sharalaryn qarastyrady. Sonymen qatar ınternet-kazıno qyzmetine, onyń ishinde Qazaqstan aýmaǵyndaǵy sheteldik ınternet-kazıno qyzmetine tyıym salý belgilenedi. Budan bólek, oıyn bıznesi salasynda lıtsenzııa alý kezinde ótinish berýshilerdiń talaptaryn qatańdatý qarastyrylady.
Budan bólek, qujat Azamattyq protsessýaldyq kodekste ınternet-kazıno qyzmetin zańsyz dep taný mehanızmderi qarastyrylyp otyr. Budan bólek, Ákimshilik quqyq buzýshylyq kodekste oıyn bıznesine qatysty zań normalaryn buzǵandar úshin jaýapkershilikter naqtylanyp, qosymsha jaýapkershilikter de qamtylady.
Budan bólek, zań arqyly býkmeker keńsesi jáne totalızator kassalarynan alynatyn salyq 75 aılyq eseptik kórsetkishten 150 aılyq eseptik kórsetkishke deıin ulǵaıatyn bolady. Al býkmeker keńsesi men totalızatordyń elektrondyq kassasyna salynatyn salyq 2000 aılyq eseptik kórsetkishke deıin artady. Bul rette elektrondyq kassaǵa salyqty arttyrý negizinen ony paıdalanýshylardyń kóptigine qaraı oryn alyp otyr. Máselen, orta eseppen alǵanda ınternet-resýrs arqyly bás tigýge tirkelgen qatysýshylardyń sany 200 myń adamǵa jetedi ári olardyń 50 paıyzy turaqty qatysýshylar bolyp tabylady.
Qujattaǵy basty jańalyqtardyń biri - oıyn mekemelerin, býkmeker keńsesi kassalaryn jáne totalızatorlardy turǵyn úı ǵımarattaryna ornalastyrýǵa tyıym salynady.
Parlament qabyldaǵan zań Memleket basshysynyń qol qoıýyna joldanady.
