Oıyl sýynyń kóterilýine baılanysty bóget salyndy
ATYRAÝ. QazAqparat – Atyraý oblysynyń Qyzylqoǵa aýdanynda Oıyl ózenindegi sý deńgeıiniń kóterilýine baılanysty tasqynnyń aldyn alý úshin bóget salynyp jatyr, dep habarlaıdy QazAqparat tilshisi.
«Aınalma jol boıyndaǵy eń qaýipti ýchaskedegi Mııaly aýylynyń turǵyn úılerin qorǵaý úshin topyraq úıindisin turǵyzý, qum salynǵan qaptardy tóseý jumystary qolǵa alyndy. 13 sáýirde Atyraý qalasynan Mııaly aýylyna TJD kúshi men quraldary jiberildi. 7 motopompamen sý sorý bastaldy. Al, búgin PNS-100, AR-2 tehnıkasy sý aıdaýǵa tartyldy. Sý tasqynynyń aldyn alýǵa jergilikti atqarýshy organnan 80 adam, 7 tehnıka, 6 motopompa jáne tótenshe jaǵdaılar departamentiniń 14 qyzmetkeri men 3 tehnıkasy, 1 motorly rezeńke qaıyq, 1 motopompa jumyldyryldy. Jaǵdaı baqylaýǵa alyndy», - dep habarlady oblystyq TJD baspasóz qyzmeti.
Búgin Qyzylqoǵa aýdanynyń ákimi Nursultan Bısenbıev pen tótenshe jaǵdaılar departamenti bastyǵynyń orynbasary, polkovnık Asqat Erjanov Oıyl ózeni boıyndaǵy Aqtóbe oblysynyń Qorǵaý aýylyna deıingi aralyqty tekserdi.
Sondaı-aq, Inder aýdanynan 15 motopompa jetkizý kózdelip otyr.
Eske sala ketelik, budan buryn sý tasqynyna baılanysty Atyraý oblysynyń Saǵyz aýylynan turǵyndar evakýatsııalanyp, keıin úıine oralǵanyn jazǵan bolatynbyz.
