Oıyl ózenine zańsyz salynǵan bógetter buzylyp, arna tazartylady
ATYRAÝ. QazAqparat - Osy aptada Oıyl ózeni boıyndaǵy zańsyz salynǵan bógetter buzylyp, ózen arnasyn tazartý jumystary bastalady. Bul týraly QR EGTRM ókilderiniń Atyraý oblysyna jasaǵan jumys sapary kezinde aıtyldy, dep habarlaıdy QazAqparat atalmysh mınıstrliktiń baspasóz qyzmetine silteme jasap.
Ekologııa vıtse-mınsıtri Serik Qojanııazov, Ekologııa mınıstriniń keńesshisi Sársenbaı Eńsegenov, Sý resýrstar komıteti tóraǵasynyń orynbasary Dosbol Bekmaǵambetov, «Qazsýshar» RMK Bas dırektory Altaı Eljasov Atyraý oblysyna is-saparmen bardy. Qyzylqoǵa aýdanynda atyraýlyq jáne aqtóbelik belsendilermen kezdesti. Jergilikti turǵyndar Oıyl ózeniniń tómengi aǵysynda sý kóleminiń azaıyp jatqanyn habarlady. Oǵan sebep sý quıatyn salalarynda ornalasqan birqatar bógettiń ornalasýy deıdi.
«Oıyl ózeni - Aqtóbe oblysyndaǵy Temir aýdany, Eńbek aýyly tusyndaǵy bulaqtan bastaý alyp, Atyraý oblysyndaǵy Aqtóbe kóli tusynda tartylyp qalǵan. Osy ózen boıynda 57 bógettiń bar ekenin anyqtadyq. Bógetterdi buzý arqyly sýdyń erkin aǵýyna múmkindik jasaımyz» -, dedi Esenbaı Nurov.
Vıtse-mınıstr Serik Qojanııazov máseleniń sheshimi retinde zańsyz salynǵan bógetterdiń buzylatynyn aıtty.
«Halyqtyń qoıyp otyrǵan talaptary oryndy. Kóterilgen másele boıynsha eki oblystyń ákimdigimen birlese jumys isteıtin bolady. Zańsyz salynǵan bógetter buzylady» -, dedi Ekologııa mınıstriniń orynbasary Serik Qojanııazov.
Sondaı-aq Sý resýrstar komıteti tóraǵasynyń orynbasary Dosbol Bekmaǵambetov atalǵan máseleni sheshý úshin jospar qurylǵanyn aıtty. Máselen, Jaıyq-Kaspıı basseındik ınspektsııa tarapynan osy jyldyń naýryz aıynda Oıyl jáne Jem ózenderiniń gıdrologııalyq jaǵdaıyna qatysty baǵyttalǵan máselelerdi sheshýge arnalǵan is-shara bekitilgen.
«Iesiz sý sharýashylyǵy qurylystary tabylǵan jaǵdaıda, ony kózdelgen maqsatta is-shara rásimderin júrgizý jergilikti atqarýshy organnyń quzyretine jatady. Osyǵan oraı, árbir salynǵan qurylys nysany boıynsha Aqtóbe oblysy ákimdigine bulaqtardy tazartý, kedergi keltirip turǵan bógetterdi tranzıttik rejımge qoıý jáne ózen arnasyn tolyqtaı jaýyp turǵan bógetterdi buzdyrý boıynsha usynys jasaldy. Sondaı-aq, Atyraý oblysy ákimdigine Oıyl ózeniniń tómengi aǵysyn sýmen qamtamasyz etý boıynsha usynys berildi» -, dedi Dosbol Bekmaǵambetov.
Aıta ketsek, bıyl mamyr aıynyń 13-18 kúnderi komıssııa músheleri atalǵan bógetterdi aralady. Onyń quramyna Ekologııa mınıstrliginiń ókilderi, Oıyl janashyrlary, Aqtóbe oblysynyń jáne aýdandyq ákimdik ókilderi qatysty. Nátıjesinde Muǵaljar, Qobda, Temir jáne Oıyl aýdandary aýmaǵynda Oıyl ózeniniń joǵary aǵysynda jáne basseıninde 57 gıdrotehnıkalyq qurylystyń bary anyqtaldy. Onyń ishinde: respýblıkalyq menshiktegi - 8, kommýnaldyq menshiktegi - 3, ıesiz bógetter - 34, kópir nemese kóterme jol -5, tazartýdy qajet etetin bulaq sany - 7. Bógetter ózen arnasynda Keńes odaǵy kezinde salynǵan, tozyǵy jetken. Bul óz kezeginde sýdyń erkin ótýine kedergi keltirip otyr.
