Oıyl ózeninde balyqtyń qyrylýy: Energetıka mınıstrligi túsinik berdi

NUR-SULTAN. QazAqparat - Energetıka mınıstrligi Oıyl ózeninde balyqtardyń qyrylýyna baılanysty túsinikteme berdi, dep habarlaıdy QazAqparat tilshisi.

Eske sala ketsek, buǵan deıin áleýmettik jelilerde Qyzylqoǵa aýdanyndaǵy Oıyl ózeniniń jaǵasynda qyrylǵan balyqtar beınelengen vıdeo taraǵan bolatyn. Bul faktini Atyraýda júrgen QR AShM Orman sharýashylyǵy jáne janýarlar dúnıesi komıteti tóraǵasy orynbasarynyń mindetin atqarýshy Narıman Júnisov rastady.

Búgin Energetıka mınıstrligi atalmysh fakt boıynsha habarlama taratty.

«Oıyl ózeni Qazaqstannyń batysynda ornalasqan. Bastaýy Aqtóbe oblysyndaǵy Muǵaljar taýlarynan bastalyp, shyǵystan batysqa qaraı Atyraý oblysy arqyly aǵady. Oıyldyń uzyndyǵy - 800 shaqyrym. Basseın aýmaǵy - 31 500 km². Aqtóbe ózenine quıady. Ózen arnasy Kaspıı teńizi men Jaıyq ózeninen aıtarlyqtaı qashyqtyqta jatyr», - delingen habarlamada.

Energetıka mınıstrliginiń habarlaýynsha, betki sýlardyń sapasyna óndiristik faktorlar áser etpeıdi. Sebebi, Oıyl ózeni Atyraý qalasynan 400 shaqyrym jerde aǵyp jatyr. Ózennen 100 shaqyrym qashyqtyqta «Saǵyz Petroleým Kompanı» kompanııasy munaı óndirý boıynsha jumys júrgizýda. Sonymen birge, ózennen 25 shaqyrym jerde «Fırma Ada» JShS geologııalyq barlaý jumystaryn 2018 jyldyń 3 toqsanynda aıaqtaǵan.

«Aldyn ala aqparat boıynsha, Atyraý oblysy arqyly aǵyp ótetin ózen aýmaǵynda 5 tonna balyq qyrylǵan. Oqıǵa ornyna arnaıy komıssııa shyqty. Ol komıssııanyń quramyna Atyraý oblysynyń memlekettik organdarynyń, Energetıka mınıstrligi men Aýyl sharýashylyǵy mınıstrliginń mamandary kirdi. Olar balyq pen sýdyń synamasyn tekseretin bolady», - delingen habarlamada.

Aqtóbe oblysy tarapynan balyqtyń qyrylýy tirkelmegen.

«Dese de, Oıyl ózeniniń betki sýlarynyń jaǵdaıyna taldaý jasaý maqsatynda «Qazgıdromet» RMK men Aqtóbe oblysy boıynsha Ekologııa departamentiniń mamandary shyqty. Jergilikti atqarýshy organdardyń ókilderi halyqpen birlesip, qyrylǵan balyqtardy jınaý jáne joıý jumystaryn júrgizip jatyr. AShM mamandarynyń aldyn ala nusqasy boıynsha, balyqtardyń qyrylýyna Oıyl ózeniniń betki sýlarynda otteginiń jetispeı qalýy sebep bolǵan», - dep habarlaıdy Energetıka mınıstrliginen.

Qazirgi ýaqytta Oıyl ózenindegi jaǵdaı jáne ekologııalyq ahýaldy anyqtaý maqsatynda jumys júrgizilip jatyr.