Oısyz ári orynsyz - májilismen Muhtar Erman reseılik depýtattardyń málimdemesi jaıly

«12 jeltoqsanda Qazaqstan Respýblıkasy Syrtqy ister mınıstrligi Reseı Federatsııasy Memlekettik Dýmasynyń «Edınaıa Rossııa» partııasynan shyqqan depýtaty, sondaǵy Bilim jáne ǵylym komıtetiniń tóraǵasy Vıacheslav Nıkonovtyń Birinshi arna arqyly efırge shyqqan málimdemesine baılanysty resmı túrde óz ustanymyn bildirdi. Alaıda reseılik taraptyń eshqandaı resmı reaktsııasy men oǵan bergen baǵasy jarııalanǵan joq. V.Nıkonovtyń ózi «baýyrlas Qazaqstanǵa degen eń izgi sezimin» bildire otyryp, «... Qazaqstan Respýblıkasynyń shekarasyna aınalǵan Qazaq KSR-niń shekarasy aıqyndalǵanda Qazaqstannyń múddeleri tolyǵymen eskerilgenin...» jazyp, óz málimdemesin túzegendeı keıip tanytty», - deıdi Muhtar Erman.

Depýtattyń aıtýynsha reseılik buqaralyq aqparat quraldary men áleýmettik jelilerinde «otqa maı quıatyn» arandatýshy málimdemeler tarap jatyr. Atap aıtqanda, Memlekettik dýmanyń depýtaty Evgenıı Fedorov depýtattyq korpýstaǵy áriptesiniń sózin qoldap, «...Qazaqstannyń qazirgi aýmaǵy Reseıden jalǵa alynǵanyn ...» atap ótip, odan aryǵa ketti. Buǵan álbette Qazaqstan azamattary narazylyǵyn bildirip, áleýmettik jelilerde «qatal qaqtyǵystar» týyndap jatyr.

«Osyǵan baılanysty ózimniń jáne ózimniń áriptesterim, Májilis depýtattarynyń atynan reseılik saıasatkerlerdiń Qazaqstanǵa qarsy arandatýshy shabýyldarynyń dostyq sıpaty joqtyǵyn jáne bul jaǵdaı qazaq pen orys halyqtarynyń arasynda qalyptasqan tatý kórshilik jáne odaqtastyq qatynastarǵa eleýli zııan keltiretinin aıtqym keledi. Osy turǵyda men depýtat E.Fedorovtyń esine myna jaıdy salǵym keledi: búgingi tańda Qazaqstan men Reseıdi strategııalyq seriktestik, Máńgilik dostyq pen odaqtastyq sharty, delımıtatsııalanǵan jáne belgilenýi aıaqtalýǵa jaqyn jeti jarym myń shaqyrymnan astam memlekettik shekara baılanystyrady. Oıǵa syımaıtyn jáne orynsyz málimdemelerdi jasamaı turyp, osy jaǵdaıdyń bári de eskerilýi kerek», - deıdi ol.

Muhtar Erman mundaı málimdemelerdiń Memlekettik dýma depýtattarynyń, kópultty memlekettiń halyq qalaýlylarynyń aýzynan shyǵyp jatqanyna ókinishin bildirdi.

«Biz parlamenttik qyzmetimizde bireýdi qorlap, arandatyp, mundaı málimdemelerge jol bermeýimiz kerek. Dostyǵymyzdy qasterlep, baǵalaýymyz kerek. Biz Reseıdegi parlamenttik korpýstyń basym kópshiligi osy pozıtsııany ustanbaıtynyna, qazaqstandyq-reseılik qatynastardy odan ári nyǵaıtýǵa múddeli ekenine senimdimiz. «Haıp» ańshylarnyyń mundaı ultaralyq jáne aýmaqtq taqyryptaǵy demarshtary bizdiń júzdegen jyldar boıy dostyǵymyzdyń irgesin bekitgen mıllıondaǵan qazaq pen orystyń namysyna tıedi.

Osyǵan baılanysty biz Reseı Federatsııasynyń Memlekettik dýmasynyń buǵan qatysty tıisti baǵasyn kútemiz. Eki eldiń zań shyǵarýshy organdary arasyndaǵy senimdi qarym-qatynasty saqtaý úshin biz reseılik áriptesterimizdi budan ári Reseı Federatsııasynyń memleket qaıratkerleriniń osyndaı sıpattaǵy málimdemelerine jol bermeıtin sharalar qabyldaýǵa shaqyramyz», - dedi Muhtar Erman.

Eske sala ketsek 12 jeltoqsanda osy málimdemelerge baılanysty Qazaqstan Respýblıkasynyń Syrtqy ister mınıstrligine Reseı Federatsııasynyń Ýaqytsha senimdi ókili Aleksandr Komarov shaqyrylǵan bolatyn. Kezdesý barysynda Syrtqy ister mınıstriniń orynbasary Marat Syzdyqov Reseı Federatsııasy Memlekettik Dýmasynyń Bilim jáne ǵylym jónindegi komıtetiniń tóraǵasy Vıacheslav Nıkonovtyń Birinshi arnadaǵy «Qazaqstan aýmaǵy - Reseı tarapynan úlken syılyq» degen sózine qatysty túsinispeýshilik bildirdi. Keıbir reseılik saıasatkerlerdiń Qazaqstanǵa qatysty arandatýshylyq áreketteriniń jıilep ketýi memleketterimiz arasyndaǵy odaqtastyq qatynastarǵa aıtarlyqtaı nuqsan keltiretini atap ótildi.

Al senator Muhtar Qul-Muhammed «Bul – mıllıondaǵan qazaq pen orystyń tarıhı tanymyn qorlaý» ekenin jetkizgen bolatyn.