Oırat Temirbaev: Kásipkerlerge qarjylaı demeý kórsetilip jatqany qýantady
SEMEI. QazAqparat – Elimizde «Bıznestiń jol kartasy-2025» baǵdarlamasy aıasynda jeke kásipkerlerge jan-jaqty qoldaý kórsetilýde. Ásirese koronavırýs pandemııasy tusynda talaı qıyndyqqa tap bolǵan bıznes ókilderine demeý aýadaı qajet. Memleketten kómek alyp, kásipten násip taýyp otyrǵandardyń biri – Semeı qalasyndaǵy «Tumar-Kondıter» JShS. QazAqparat tilshisi atalǵan seriktestik dırektoryna habarlasyp, jumystarynyń qalaı júrip jatqandyǵyn bildi.
«Ashylǵanymyzǵa 2 jarym jyl ǵana boldy. Áýelde nan pisirip bastadyq. Keıinnen oılana kele tort jasaýdy qolǵa aldyq. Óıtkeni Semeıde dál osy naryq bos turǵan. Sátin salyp jumysymyz alǵa basty. Alýan túrli torttarymyzǵa suranys kún ótken saıyn arta berdi. Kásibimizdi odan saıyn damytý úshin «Bıznestiń jol kartasy-2025» baǵdarlamasyna qatysyp kórýge bel baıladyq», - deıdi Oırat Temirbaev.
Onyń aıtýynsha, osydan keıin bıznes jospar qurylyp, sátti qorǵalǵan. Sóıtip, memleketten 40 mln teńgeden astam qarjylaı qoldaý kórsetilipti.
«Sol somaǵa qajetti qural-jabdyqtardy satyp aldyq. Eń basynda bizde tek 10 adam ǵana jumys isteıtin. Qazir 60 adam eńbek etýde. Semeı shahary boıynsha ónimderdi saýdalaıtyn 7 núktemiz bar. Elimizde shaǵyn kásippen aınalysatyndarǵa qarjylaı demeý kórsetilip jatqany qýantady», - dedi «Tumar-Kondıter» JShS dırektory.
Pandemııa kezinde talaı qıyndyq týyndapty. Atap aıtqanda, mektepter karantınge jabylyp, toı-tomalaq ótkizýge tyıym salynǵandyqtan tortqa tapsyrys beretinder azaıyp ketken.
«Bilim ordalary úshin tátti toqashtar, úılený toılary men týǵan kún keshterine arnaıy torttar pisiretin edik. Álemdi jaılaǵan qaýipti derttiń saldarynan osy baǵyttaǵy jumystarymyz toqtap qaldy. Esesine ónimderimizdi úıdi-úılerge jetkizýdi jolǵa qoıdyq. Aldaǵy ýaqytta basqa da tátti-dámdilerdi jasaýdy josparlap otyrmyz. Onyń ishinde suly pechenesine erekshe den qoıylmaq», - dedi Oırat Temirbaev.
