Oınaýǵa shyǵyp, oralmaǵan: Qyzylordada alty jastaǵy qyz izdestirilip jatyr
QYZYLORDA. KAZINFORM – Qyzylorda qalasynda iz-túzsiz joǵalǵan alty jastaǵy Medına Muratbekqyzyn izdestirý jumysy eki kúnnen beri nátıje bermedi. Bul týraly oblystyq Polıtsııa departamentinen málimdedi.
Aldyn ala málimet boıynsha ol 5 maýsym kúni saǵat 18:30 shamasynda qalanyń Rısmash bóligindegi Syrdarııa ózeniniń jaǵalaýynda ornalasqan bóget aýmaǵyna oınaýǵa shyǵyp, sodan beri úıine oralmaǵan.
- Polıtsııa búldirshinge tán belgilerdi jarııalady. Boıy – 110–120 santımetr, dene bitimi aryq, shashy qara tústi, ıyǵyna deıin, kózi qońyr. Ústinde ashyq jasyl tústi gúldi fýtbolka, aq tústi shorty, kók tústi súıretpe aıaq kıim bolǵan. Іzdeý jumysyna polıtsııa qyzmetkerleri, Ulttyq ulan sarbazdary, oblystyq tótenshe jaǵdaılar departamentiniń mamandary, eriktiler, týystary jáne jergilikti turǵyndar jumyldy. Sonymen qatar jergilikti atqarýshy organdar tarapynan qajetti kómek kórsetilip jatyr. Іzdestirý sharalaryna arnaıy iz kesýshi ıtter, drondar men súńgýirler tartyldy. Jedel izdestirý toptary qurylyp, qajetti is-sharalardy qolǵa aldy, - delingen habarlamada.
Joǵalǵan qyz balanyń fotosýreti men jeke belgileri týraly aqparat barlyq tıisti aýmaqtarǵa taratyldy. Polıtsııa Medına Muratbekqyzynyń júrgen jeri týraly qandaı da bir aqparat belgili bolsa, dereý 102 arnasyna habarlasýdy suraıdy.
Eske salsaq, buǵan deıin Taldyqorǵanda 30 sáýir kúni joǵalyp ketken 10 jasar balany izdeý sharalary nátıjeli aıaqtalǵan edi.
