Oınaýǵa qıyn, biraq jeńgiń keletin oıynshylar kóp – Elena Rybakınamen suhbat

ASTANA. QazAqparat – Qazaqstannyń birinshi, álemniń jetinshi raketkasy Elena Rybakına «Jibek Joly» telearnasyna eksklıýzıvti suhbat berdi. Suhbatta barysynda búgin elordada bastalatyn Bıllı Djın Kıng kýboginiń irikteý kezeńiniń aıasynda Polshamen ótetin matchqa daıyndyq barysy, sporttaǵy jospary týraly jáne álemdik tennıs juldyzdary arasynda kimdi qarsylas sanaıtynyn aıtyp berdi, dep habarlaıdy QazAqparat tilshisi.

- Elena, bizge ýaqyt bólgenińiz úshin rahmet. Negizgi suraqtan bastaımyn. Bıllı Djın Kıng kýbogi sizdiń mansabyńyzdaǵy birinshi kýbok emes. Mysaly, Glazgodaǵy oıyn týraly Qazaqstan quramasy kútpegen jerden Ulybrıtanııany qapy qaldyrǵanyn kópshilik jazyp, aıtyp júr. Búgin bastalatyn kýbokta ózińizdiń jáne komanda aldyna qandaı mindet qoıyp otyrsyz? Komandadaǵy atmosfera qandaı? Ne kútesiz? Kóńil-kúı qalaı?

- Árıne, maqsatymyz – jeńiske jetý. Meniń oıymsha, biz myqty komandamyz. Bar kúshimizdi salyp, tyrysyp baǵamyz. Komandada atmosfera jaqsy. Biz jaqsy óner kórsetip, jeńiske jetemiz dep úmittenemin. Mundaı týrnırlerde emotsııa basym bolady der edim. Meniń oıymsha, bári alańdap otyr, bir jaǵynan qyzdar úshin bul úlken tájirıbe.

- Sońǵy eki jyl ishinde óte sátti ári tabysty oıyn kórsetip júrsiz. Ýımbldon men AQSh-taǵy Indıan-Ýells týrnırindegi jeńis,, Australian Open, Miami týrnırlerinde fınalǵa jettińiz, taǵy sol sııaqty. Osyndaı deńgeıge jetý sizge moraldyq jáne fızıkalyq turǵydan aýyrǵa soqpady ma? Bıylǵa jospar qandaı?

- Árıne, Úlken dýlyǵa týrnırin utý ońaı emes. Sońǵy kezdegi jeńisterdiń barlyǵy - bul búkil komandanyń aýqymdy jumysy jáne men úshin úlken tájirıbe. Bolashaqta osy joldan taımaı, oıyndy jaqsartyp, barlyq jaǵynan alǵa umtylý kerek. Alda taǵy bir Úlken dýlyǵa týrnırin jeńip alsam deımin.

- Qazir qandaı týrnırlerge daıyndalyp jatyrsyz?

- Qazir jospar boıynsha Shtýtgart týrnıri tur. Odan ári Rım, Madrıdtegi iri týrnırler jáne Úlken dýlyǵa (Rolan Garros – red) bar.

- Siz úlken nátıjege qol jetkizýdi maqsat etip qoıasyz. Sporttan tys nársege ýaqyt bar ma, bos ýaqytta nemen aınalysasyz?

- Men sporttan tys kóp dúnıemen aınalysamyn dep aıta almaımyn. Óıtkeni, ýaqyt az. Bos ýaqytym otbasymmen ótedi. Múmkindiginshe jaqyndarymmen birge bolýǵa tyrysamyn.

- Basty qarsylasyńyz retinde kimderdi sanaısyz?

- Myqty oıynshylar jetkilikti. Olardyń kóbimen oınaǵan match maǵan aýyr tıdi. Jyl basynan berilmeıtin qarsylasymnyń biri Arına Sobolenko shyǵar. Oınaý ońaıǵa túspeıtin, biraq jeńgiń keletin oıynshylar kóp. Kreıchıkova óte myqty oıynshy, qazir Ons Jaber tennıske qaıta oralyp, týrnırde jeńiske jetti. Odan bólek, Iga Shventek bar. Qarsylastar jetkilikti, jumys isteý kerek.

- Suhbatyńyz úshin rahmet!

Aıta keteıik, keshe Memleket basshysy Elena Rybakınany qabyldady.

Tennısshi málim etkendeı, Qasym-Jomart Toqaev Elena Rybakınaǵa oramal men saǵat syılaǵan.

Sondaı-aq, sportshy BAQ ókilderiniń saýalyna jaýap bere otyryp qazaqstandyq jankúıerlerdiń erekshe qoldaý kórsetetinin aıtyp ótti.

Odan bólek, Elena Rybakına jeńiske jetýdiń ońaıǵa soqpaıtynyn aıta kele, keıde tennısti tastap ketkisi keletin sátter bolatynyn moıyndady.