Oıly paıym men pragmatıkalyq maqsattarǵa súıenýimiz kerek – QR Prezıdenti
«Aldaǵy reformalar, eń aldymen saıası júıe azamattardyń múddesin qorǵaı alatyndaı sıpatta júrgizilýi tıis. Bizdiń basty maqsatymyz ózgerissiz qalady – memlekettiń turaqtylyǵy. Memlekettiń barlyq salasy men qoǵamdy modernızatsııalaý – strategııalyq damý negizderine saı, azamattyq qoǵamnyń pikirin taldaý arqyly júzege asyrylady. Qurǵaq ýádeler men popýlızm – ortańqol saıasatkerlerdiń isi. Al biz oıly paıym men pragmatıkalyq maqsattarǵa súıenýimiz kerek. Bul qaǵıdattar bizdiń jumystyń mazmunyn quraıdy degen senimdemin», - dedi Memleket basshysy Qasym-Jomart Toqaev elordada ótip jatqan Ulttyq qoǵamdyq senim keńesiniń alǵashqy otyrysynda.
Prezıdenttiń aıtýyna qaraǵanda, eshkim toqyraý kezeńde ómir súrgisi kelmeıdi.
«Bizdiń bárimiz reforma úshin daıynbyz. Bul jerde naqty qandaı reforma kerek degen suraq bar. Onyń jaýaby birlese aıqyndaǵan naqty usynystarda», - dedi ol.
Eske sala ketsek, búgin elordada Ulttyq qoǵamdyq senim keńesiniń alǵashqy otyrysy ótip jatyr. Otyrysqa Qazaqstan Prezıdenti Qasym-Jomart Toqaev qatysýda.
Ulttyq keńestiń quramy belgili memleket jáne qoǵam qaıratkerleriniń, saıası partııalar, úkimettik emes sektor ókilderiniń qatarynan qalyptastyrylady. Qazaqstan Respýblıkasy Prezıdenti Ákimshiliginiń Basshysy, Qazaqstan Respýblıkasyndaǵy Adam quqyqtary jónindegi ýákil, Qazaqstan Respýblıkasyndaǵy Bala quqyqtary jónindegi ýákil, Qazaqstan kásipkerleriniń quqyqtaryn qorǵaý jónindegi ýákil óz laýazymdaryna sáıkes Ulttyq keńestiń quramyna kiredi.
