Oıyn bıznesiniń korporatıvtik tabys salyǵy ósýi múmkin
ASTANA. KAZINFORM – Ulttyq ekonomıka vıtse-mınıstri Azamat Ámrın «Atameken» ulttyq kásipkerler palatasyndaǵy jańa Salyq kodeksin tanystyrýǵa arnalǵan is-sharada korporatıvtik tabys salyǵynyń saralanǵan mólsherlemesi qalaı belgilenetinin túsindirdi.
«Korporatıvtik tabys salyǵynyń bazalyq mólsherlemesin sol kúıi qaldyramyz. Ol 20 paıyz bolady. Al bank sektory men oıyn bıznesi salasynda mólsherleme 25 paıyzǵa deıin kóteriledi. Al qaıta óńdeý ónerkásibi men medıtsına, bilim berý sııaqty áleýmettik salalarda, qarjylyq lızıng sektorynda 10 paıyzdyq tómendetilgen mólsherleme bolady. Ónerkásip jáne qurylys mınıstrligi korporatıvtik tabys salyǵynyń tómendetilgen mólsherlemesi qoldanylatyn qyzmet túrleriniń tizbesin Ulttyq ekonomıka mınıstrliginiń maquldaýymen qalyptastyrady», - dedi ol.
Vıtse-mınıstr aýyl sharýashylyǵy taýaryn óndirýshiler úshin atalǵan mólsherleme birshama azaıatynyn atap ótti.
«Aýyl sharýashylyǵy taýaryn óndirýshilerge korporatıvtik tabys salyǵynyń bazalyq mólsherlemesi 3 paıyz dep belgilenip otyr. Biraq bul – taza arıfmetıkalyq dúnıe. Óıtkeni qazir bul mólsherleme 10 paıyz. Biz saladaǵy salyq somasyn 70 paıyzǵa tómendetip otyrmyz. Sonda 3 paıyz qalady degen sóz», - dedi Azamat Ámrın.
