Oıyn bıznesine ruqsat etiletin aýmaqtardyń tizbesi keńeıtiledi - zań
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine týrıstik salany jáne balalar sportyn qoldaý máseleleri boıynsha ózgerister men tolyqtyrýlar engizý týraly» Zań maquldandy.
Zańdy qabyldaýdyń maqsaty - ekonomıkany ártaraptandyrý, ishki jáne kelý týrızmin damytý, adamı kapıtaldy nyǵaıtý jáne balalar men jasóspirimder úshin sporttyń qoljetimdiligin arttyrý jónindegi memlekettik basymdyqtardy iske asyrý. Osy qujat artqyly Qazaqstan Respýblıkasynyń 13 Zańyna ózgerister men tolyqtyrýlar engiziledi.
Senattyń Áleýmettik-mádenı damý jáne ǵylym komıtetiniń málimetine qaraǵanda, «Aýdıtorlyq qyzmet týraly» Zańǵa bıýdjettik jáne bıýdjetten tys qarajatty jumsaýdyń ashyqtyǵyn qamtamasyz etý úshin sport salasyndaǵy bıýdjetten tys qarajatty bólý jónindegi biryńǵaı operatordyń qarjylyq eseptiliginiń mindetti jyl saıynǵy aýdıti boıynsha norma engiziledi.
Zańmen «Qazaqstan Respýblıkasyndaǵy týrıstik qyzmet týraly» Zańyna ýákiletti organnyń týrıstik ónimge, kelý týrızmi salasyndaǵy týrıstik operatorlardyń shyǵyndaryn sýbsıdııalaý mólsherine, týrısterdi ornalastyrý oryndaryn salý men rekonstrýktsııalaý kezinde kásipkerlik sýbektileri shyǵyndarynyń bir bóligin óteýge qoıylatyn talaptardy aıqyndaý jónindegi quzyretterin naqtylaý bóliginde ózgerister engiziledi.
Bul qujatpen kásipkerlik sýbektileriniń týrısterdi ornalastyrý oryndaryn, sanatorıılik-kýrorttyq uıymdardy, tanytym ortalyqtaryn, taý shańǵysy kýrorttary, jol boıyndaǵy servıs obektileri úshin jabdyqtar men tehnıkany ıelikten shyǵarmaý jáne nysanaly paıdalaný monıtorıngin júzege asyrý, sondaı-aq basym týrıstik aýmaqtardyń shekaralaryn aıqyndaý jónindegi jergilikti atqarýshy organdardyń jańa quzyreti engiziledi.
«Dene shynyqtyrý jáne sport týraly» Zańǵa qosymsha bilim berý uıymdary retinde balalar-jasóspirimder sport mektebi (BJSM) uǵymy bekitiledi, BJSM-ǵa memlekettik tapsyrys, jan basyna shaqqandaǵy qarjylandyrý normatıvi, memlekettik tapsyrysty ornalastyrýdyń biryńǵaı qaǵıdalary engiziledi. Sondaı-aq derekterdi esepke alý, taldaý jáne monıtorıngteý úshin dene shynyqtyrý men sporttyń tsıfrlyq platformasy qurylady. Memlekettik sport uıymdarynyń derekterdi tsıfrlyq platformaǵa berý mindeti belgilenedi.
Qazaqstan týrıstik avtobýstardyń shekaradan ótýin jeńildetedi
- Zań týrızm salasyndaǵy quqyqtyq retteýdi jetildirýge, uǵymdyq apparatty birizdendirýge, týrıstik ınfraqurylymdy damytýdy jáne qoldanystaǵy memlekettik qoldaý tetikterin rásimdik turǵydan júıeleýge, sondaı-aq balalar men jasóspirimder sportyn qarjylandyrý men basqarýdyń tıimdiligin arttyrýǵa baǵyttalǵan. Týrızm salasyn damytýǵa qatysty zańmen «gıd», «ekskýrsııa júrgizýshi», «týrızm nusqaýshysy», «týrıstik resýrstar» jáne «týrızm obektileri» sııaqty negizgi uǵymdar naqtylanyp, birizdendiriledi. Gıdter men týrızm nusqaýshylarynyń qyzmeti kásipkerlik nysanyna baılanysty shektelmeıtin bolady, bul quqyqtyq beıtaraptyqty saqtap, bilikti mamandardyń sanyn arttyrýǵa jol ashady, - dedi senator Amangeldi Esbaı.
Ýákiletti organǵa gıdter, ekskýrsııa júrgizýshiler jáne týrızm nusqaýshylary qyzmetiniń qaǵıdalaryn, sondaı-aq kásipkerlik sýbektileriniń shyǵyndaryn óteý ári sýbsıdııalaý qaǵıdalaryn, sharttary men mólsherlerin bekitý jónindegi ókilettikter naqtylanady. Bul rette jańa qoldaý sharalary engizilmeıdi, qoldanystaǵy mehanızmder rásimdik turǵydan naqtylanatyn bolady.
- Memlekettik shekara arqyly ótkizý pýnktterinde qujattardy kezekten tys resimdeý jáne ótkizý tártibin tek turaqty halyqaralyq jolaýshylar tasymalyn júzege asyratyn avtobýstarǵa ǵana emes, týrıstik operatorlar uıymdastyratyn turaqty emes halyqaralyq jolaýshylar tasymalyna da qoldanýdy kózdeıtin túzetý engiziledi. Atalǵan norma rásimdik sıpatqa ıe jáne týrıstik avtobýstardyń shekaradan ótý ýaqytyn qysqartýǵa baǵyttalǵan, - dedi depýtat.
Sonymen qatar, zańmen elimizdiń oıyn bıznesin ornalastyrýǵa ruqsat etiletin aýmaqtardyń tizbesi keńeıtiledi.
- Burynǵy Qapshaǵaı, Býrabaıdan bólek, endi Mańǵystaý, Jetisý, Almaty jáne Shyǵys Qazaqstan oblystarynyń týrıstik mańyzy bar aımaqtarynda jańa oıyn zonalarynyń qurylýy óńirlerge ınvestorlar men sheteldik saıahatshylardy tartýdyń qosymsha tetigine aınalady. Bul rette zańda mańyzdy áleýmettik jáne ekonomıkalyq tosqaýyl qoıylǵan: jańadan belgilengen aýmaqtardaǵy oıyn mekemelerine tek sheteldik azamattardyń kirýine ruqsat beriledi. Mundaı tártip ishki áleýmettik táýekelderdi azaıta otyryp, syrtqy týrızmdi yntalandyrýǵa, bıýdjetke túsetin salyq túsimderin arttyrýǵa jáne halyqaralyq deńgeıdegi servıstik ınfraqurylymnyń qalyptasýyna tikeleı yqpal etedi. Mundaı tásil halyqaralyq tájirıbede keńinen qoldanylady. Oıyn zonalarynyń shekaralaryn belgileýdegi naqtylyq pen ekologııalyq shekteýler bul salanyń tabıǵı jáne mádenı muralarǵa zııan keltirmeı, júıeli damýyn qamtamasyz etedi, - dedi senator.
Zańnyń taǵy bir negizgi baǵyttarynyń biri - balalar men jasóspirimder sportyn qarjylandyrý júıesin reformalaý. Balalar men jasóspirimder sport mektepterinde memlekettik tapsyrys engizilip, qarajat bilim alýshylar sanyna qaraı jan basyna shaqqandaǵy normatıv arqyly ashyq jáne ádil bólinedi. Bul balalardyń sportpen shuǵyldanýyna qoljetimdilikti arttyryp, bıýdjet qarajatynyń nysanaly jumsalýyn qamtamasyz etedi. Balalar men jasóspirimder sport mektepteri osy sportty damytýǵa baǵyttalǵan bilim berý baǵdarlamalaryn iske asyratyn qosymsha bilim berý uıymdary retinde zańnamalyq túrde bekitiledi.
- Dene shynyqtyrý jáne sport salasynda tsıfrlyq platforma engizilip, memlekettik sport sýbektileri derekterdi platformaǵa usynady. Aqparattyń sapasy, ýaqtylyǵy jáne durystyǵy úshin jaýapkershilik engiziledi. Bul basqarýdy jetildirýge, qarjylandyrýdyń ashyqtyǵyn arttyrýǵa jáne analıtıkalyq sheshim qabyldaýdy qamtamasyz etedi. Taǵy toqtalatyn másele, bıýdjetten tys qarajattardy bólýdiń biryńǵaı operatory jyl saıyn aýdıtten ótip, qarjylyq tártip kúsheıtiledi, - dep naqtylady Amangeldi Esbaı.
Budan buryn habarlanǵandaı, 2025 jyldyń qorytyndysy boıynsha týrızm salasyndaǵy negizgi kapıtalǵa salynǵan ınvestıtsııa kólemi 1,25 trln teńgege jetip, aldyńǵy jylmen salystyrǵanda 33%-ǵa artty.