Oıyl ózeniniń eki betine kúnine 480 adamdy qaıyqpen alyp ótemiz– qutqarýshy
AQTÓBE. KAZINFORM – Aqtóbe qalasyndaǵy №2 jáne №3 qutqarý beketteriniń qutqarýshylary qazir Oıyl aýdanynda júr. Olar on kún boıy adamdar men gýmanıtarlyq kómekti qaıyqpen tasydy. Bul jumys áli jalǵasyp jatyr.
Aqtóbe oblysy Oıyl aýdanynda 29-naýryz kúni tótenshe jaǵdaı jarııalanyp, qaladan tótenshe jaǵdaılar qyzmetkerleri jiberildi.
Qutqarýshylardyń tizimine 6 qyzmetker engen. Olar: N Bozshın, A.Quttybaev, Sh.Turmaǵanbet, R.Malıkov, A. Abdýllın, R.Harvenko. Sodan beri 10 kúnnen astam ýaqyt ótse de qutqarýshylar tynymsyz jumys istep jatyr.
«Biz 29-naýryz ben 1-sáýir kúnderi Oıyl aýdanynyń Qaratal aýylynda boldyq. Sý tasqyny kezinde adamdar mektepke qonystanǵan eken. Alǵashqy kezderi aýyl ishin bilmeı, baǵamdaý jumysy júrdi. Qaı jerde sý tereń, qaı mań yńǵaıly ekenin baryp, tekserip kórdik. Sóıtip biz mektepte qalǵan adamdardy qaıyqpen alyp shyǵyp, tikushaqqa jetkizdik. Sonymen birge mektepke gýmanıtarlyq kómek tasymaldadyq. Tórt kún sonda ótti. Qaratal aýylyna barǵan kezde biz ózimiz tasjol boıynda uıyqtap shyqtyq. Qutqarýshylarǵa arnalǵan arnaıy qap boldy. Mektepke de barýǵa bolatyn edi. Biraq onda adam kóp, mazalaǵymyz kelmedi»,- dedi №2 qutqarý beketiniń jetekshi Nurbol Bozshın.
Keıin qutqarýshylar Oıyl aýdanynyń ortalyǵynda ózenniń eki betine adamdardy, arnaıy mamandardy tasýǵa kóshti.
«Qazirgi kezde jaǵdaı qalypqa túse bastady, jumys júıelendi. Bizdiń mindetimiz ózenniń eki betine adam tasý. Jumys tańerteń 7:00-de bastalady. Saǵat 20:00-ge deıin sonda júremiz. Biraq keıde adamdar «arǵy betke barýym kerek, qonatyn jerim joq», dep ótinish aıtyp, qaýipti bolsa da saǵat 22:00-ge deıin júrip qalamyz. Sonymen birge qaıyqpen gaz qubyryn jóndeıtin, elektrıkterdi de tasımyz. Keshe ǵana aýdanǵa kópirdiń jaramdylyǵyn tekseretin arnaıy mamandar kelip, olardyń fotoǵa túsirýine jaǵdaı jasaldy»,- dedi Nurbol Bozshın.
Oıyl aýdanynda oblystyq Tótenshe jaǵdaılar departamentiniń eki qaıyǵy bar. Ózenniń eki betine tasıtyn temir qaıyqqa 5-6 adam, al motorly rezeńke qaıyqqa 3-4 adam mine alady. Qutqarýshylar shuǵyl medıtsınalyq kómekpen jetkizilgen naýqastarǵa, qarııalarǵa, arnaıy mamandarǵa basymdyq beredi.
«Kúnine 80-100 reıs jasaımyz. Qaıyqpen ózenniń eki betine 480-490 adam tasymaldanady. Oıyl ózeninen qazir týra tasyp jatqan joqpyz. Sebebi týra joly batpaq, adamdar júre almaıdy. Sondyqtan 2 shaqyrymnan asatyn aınalma jasaımyz. Bul meniń týǵan jerim, biraq Aqtóbe qalasyndaǵy Jedel qutqarý jasaǵynda jumys isteımin. Bul jumysta júrgenime 17 jyl boldy. Sodan beri túrli qutqarý jumystaryna qatystym. Al qaıyqty aıdap júrgenime 10 jylǵa jýyq ýaqyt boldy»,- №2 qutqarý beketiniń jetekshi Nurbol Bozshın.
Aıta keteıik, Nurbol Bozshın tótenshe jaǵdaılar qyzmetinde jumysyn 2007 jyly bastady. Aldymen súńgýir boldy. Keıin №1 qutqarý beketi birinshi bólimshe komandıri qyzmetin atqaryp, 2019 jyldan bastap №2 qutqarý beketiniń jetekshisi.
«Tótenshe jaǵdaı bolǵan soń adamdar keıde alǵys aıtady, keıde renjıdi. Biz kezek qoımaı, tası beremiz. Keıbiri buryn minip ketip, qalyp qoıǵany ókpesin bildirip jatady. Qutqarýshylar úzilissiz jumys isteıdi. Qajetti tamaqty jaǵaǵa ákeledi nemese jaǵada turǵan kıiz úıden aýqattanyp keledi. Munyń bári rettelip, uıymdastyrylǵan»,- dedi ol.
Eske salsaq, Oıylda pontom kópir de bar.
