Oıyqtaǵy topyraq astynan kaska, avtobýs sóresiniń bóligi jáne radıostantsııa tabyldy

PAVLODAR. KAZINFORM - Tabylǵan zattardy qutqarýshylar joǵaryǵa alyp shyqty. Oıyq túbinde qutqarý-izdestirý jumystary áli de jalǵasýda.

Maıqaıyń kenishi aýmaǵynda eki qutqarýshymen jer astyna túsip ketken avtobýsty izdeý jumystary júrip jatqanyna búgin - 30-shy kún. Pavlodar oblysynyń ákimi Asaıyn Baıhanov Telegram-kanalynda qutqarýshylarǵa tıesili birqatar zattyń tabylǵanyn habarlady. 

«Maıqaıyńaltyn» AQ kenishinde izdeý jumystary júrgizilgen jerde búgin jańa bólshekter, ıaǵnı, qutqarýshynyń kaskasy, avtobýstyń ishki sóresiniń shaǵyn bóligi jáne qutqarýshynyń «XFERRA» qol radıostantsııasy tabylyp, jer betine kóterildi», - dep jazdy óńir basshysy.

Eske sala keteıik, buǵan deıin qutqarýshylar jasaǵy shuńqyrdaǵy tas arasynan avtobýstyń qosalqy dońǵalaǵyn taýyp alǵan edi.