Oıansa - máıithanada jatyr
ASTANA. 9 qarasha. QazAqparat - Polshanyń 56 jastaǵy turǵyny jedel járdem qyzmetkerlerin sotqa bergeli otyr. Dárigerler ony kóshede uıyqtap jatqan jerinen máıithanaǵa aparyp tastapty.
Metro basylymynyń habarlaýynsha, Marek Mıhalskıı esimdi polıak esin jıǵan kezde óziniń máıitterge arnalǵan qapqa oralǵanyn sezgen. Janushyryp qapty jyrtqan ol adamdardy kómekke shaqyrady. Óziniń aıtýynsha, ol máıithanadan buryn kóshede oryndyqta demalyp otyrǵan. «Bul jaǵdaıǵa bireýler jaýap berýi tıis. Máıithanada dárigerlerdiń qarnymdy tilip jatqany túsime kiretin boldy», - deıdi polshalyq. Al dárigerlerdiń aıtýynsha, sol kúni áldekimder kóshede bir adamnyń es-tússiz jatqanyn habarlaǵan. Oqıǵa ornyna kelgen aqhalattylar álgi adamnan tirshilik belgisin tappaı, ony qapqa salyp, máıithanaǵa jóneltipti, dep jazady «Alash aınasy» gazeti.
