Otyzdan astam ofıtser emtıhanda «shpor» qoldanǵany úshin ásker qatarynan qýyldy
ASTANA. 16 qańtar. QazAqparat - AQSh Áskerı áýe kúshteriniń ıadrolyq zymyrandaryn ushyrýǵa jaýapty otyz tórt ofıtseri 15 qańtarda biliktilik arttyrý synaǵy kezinde kóshirgenderi úshin jumystarynan qýyldy. Bul týraly Associated Press habarlady.
Tekseris barysynda Montana shtatyndaǵy ÁÁK-niń Malmstrom bazasyndaǵy 341-shi zymyrandyq qanattaǵy emtıhan kezinde bir ofıtser óziniń 16 áriptesine testiń durys jaýaby jazylǵan sms-habarlamalar jiberip otyrǵandyǵy anyqtaldy. Al qalǵan 17 áskerı qyzmetker bul tártipsizdikti bilse de, tis jarmaǵandaryn moıyndap otyr.
CNN habarlaýynsha, bul tártipbuzýshylyq 2013 jyldyń qyrkúıegindegi aı saıynǵy biliktilik arttyrý emtıhandary kezinde bolǵan.
Vedomstvodaǵylar ofıtserlerdiń qylyǵyn «naǵyz bassyzdyq» jáne «ÁÁK negizgi qundylyqtaryna tolyqtaı qarama-qaıshy» áreketter dep baǵalaýda. Degenmen, sheneýnikterdiń habarlaýynsha, amerıkalyq ıadrolyq arsenalǵa eshqandaı qaýip tónip turǵan joq. Montanadaǵy ıadrolyq qarýdyń daıyndyǵyna jalpy sany 190 shamasyndaǵy adam jaýap beredi, dep habarlaıdy CNN.
Tergeý amaldary bazadaǵy eki ofıtser esirtki saqtaýda degen kúdikpen tintý júrgizilgen soń bastalǵan. Sondaı-aq, 2013 jyly qaýipsizdik tehnıkasy erejeleriniń de buzylý oqıǵalary tirkelgen bolatyn. Al 2013 jyldyń qazanynda ıadrolyq zymyrandardy jiberýge jaýapty 4 ofıtser zymyran bazasyna kiretin esikti jappastan uıyqtap qalǵandary úshin ákimshilik jaýapkershilikke tartylǵan.
