Otyz jylda táýelsiz memleketimizdiń senimdi irgetasy qalandy - Máýlen Áshimbaev
«Búginde Qazaqstan damýdyń jańa kezeńine aıaq basty. Prezıdent Qasym-Jomart Toqaev óziniń saılaýaldy baǵdarlamasynda sabaqtastyq, ádildik jáne órleý sııaqty damýdyń naqty baǵdaryn aıqyndady. Memleket Basshysynyń saıasaty eldiń ekonomıkalyq jáne saıası júıelerin ári qaraı jańǵyrtýǵa baǵyttalǵan. Eń aldymen, bul ekonomıka qurylymyn ártaraptandyrý, ony tsıfrlandyrý, óńdeý ónerkásibin damytý jáne eksportty keńeıtý», - Máýlen Áshimbaev Eýrazııalyq medıa forýmda Táýelsizdiktiń 30 jyldyǵyna arnalǵan sessııada.
Senat tóraǵasy sońǵy eki jylda Qazaqstanda keshendi saıası reformalar júrgizilgenin eske saldy. Reformalar jalǵasyp keledi, bul rette adam quqyqtaryna erekshe nazar aýdarylady.
«Jalpy, eldegi saıası reformalar sánge erý nemese saılaýshylarmen oıyn oınaý emes. Bul el Prezıdenti aıqyndaǵan memlekettiń strategııalyq baǵyty, ol óz kezeginde eldiń aldaǵy jyldardaǵy saıası turaqtylyǵy men serpindi áleýmettik-ekonomıkalyq damýynyń sharty bolyp sanalady», - dedi Senat tóraǵasy.
Sondaı-aq, Senat tóraǵasy elimizde «halyq únine qulaq asatyn memleket» qaǵıdaty negizinde memlekettik basqarý júıesiniń tıimdiligin arttyrý jumystary júrgizilip jatqanyn atap ótti.
«Prezıdent Qasym-Jomart Toqaevtyń kún tártibindegi basymdyq – adamı kapıtaldyń sapasy, densaýlyq saqtaý, bilim berý jáne áleýmettik qorǵaý. Qazirgi ýaqytta Qazaqstan – qarqyndy damyp kele jatqan memleket. Otyz jylda kóp nárse jasaldy. Eń bastysy – táýelsiz memleketimizdiń senimdi irgetasy qalandy. Degenmen alda odan da kóp nárse isteý kerek. Memlekettiliktiń irgetasyn saqtap jáne nyǵaıta otyryp, Qazaqstandy álemge ashyqtyq, toleranttylyq jáne demokratııa qaǵıdattarynda odan ári damytý óte mańyzdy», - deıdi M. Áshimbaev.