Otyz jyl eldi basqarǵan, barlyq elmen dos bolǵan - juldyzdar Nazarbaevqa jyr arnady
Jigitter prodıýserlik ujymy men ujym jetekshisi Erǵalı Ábdiraıymov Elbasynyń tarıhı málimdeme jasaǵanyn atap ótti.
«Asa mártebeli Nursultan Ábishuly! Kemeńgerligińizben keıingilerge kórsetken úlgińiz jáne izgi dara jolyńyz úshin, elimizdiń egemendigi men tuǵyrly táýelsizdigi úshin ózińizge degen qurmetimiz sheksiz! Elińiz sizge rıza, Tuńǵysh Prezıdent!», - dep jazdy Erǵalı Ábdiraıymov.
Sonymen birge, Jigitter kvartetiniń ánshisi Erdos Qanaev dombyramen jyr arnady.
«Otyz jyl eldi basqarǵan,
Barlyq elmen dos bolǵan
Elbasymyz halyqtyń
Júreginen ketpeıdi», - dedi E. Qanaev.
MýzArt tobynyń ánshisi Sáken Maıǵazıev te Tuńǵysh Prezıdentke degen qımastyq sezimin jasyrmady.
«Álem sanasqan, saıasat sahnasynda salmaǵy basym sanaýlylardyń sanatyndaǵy Elbasymyzǵa degen qımastyq sezim basym bolyp tur. Beıbitshiliktiń besiginde terbetkenińiz úshin, qazaq halqy jolynda etken eńbekterińiz úshin myń alǵys», - deıdi S. Maıǵazıev.
Óz kezeginde óner men sportty qatar alyp júrgen Ibragım Eskendir Elbasyǵa barsha qazaq jastary atynan alǵys aıtty.
«Qazaqtyń mańdaıyna bitken tulǵasyz, arpalysqan zamanda halqyn beıbit kúnge bastaǵan naǵyz batyrsyz! Jasaǵan jaqsylyǵyńyz ólsheýsiz. Jaqsylyǵyńyzdy umytpaımyz», - dedi ánshi.
Sondaı-aq, tanymal telejúrgizýshi Láılá Sultanqyzy Elbasyna alǵys aıtý estafetasyn bastady.
«Qazaqstan atty shańyraqtyń berekesin shaıqaltpaı, birligin shashpaı, kóshin alǵa súırep kelgen Ult kóshbasshysyna shyn júrekten alǵys aıtamyn jáne shynaıy alǵysqa bóleıik degen nıetpen #alǵys aıtý #challenge-in bastaǵym keledi (...) Sizdiń de alǵys aıtar kem degende 10 sebebińiz bar. Endeshe alǵysyńyzdy jazyp, #01_one_love degen heshtegpen belgileı ketińiz», - dep usynys bildirdi Láılá Sultanqyzy.
Aıta keteıik, búgin Nursultan Nazarbaev prezıdenttik ókilettigin toqtatatynyn málimdedi. Ol Qazaqstandy otyz jylǵa jýyq basqardy.