Otyz úsh memlekettiń 300-ge jýyq balýany elordada ótetin Álem birinshiliginde kúsh synasady

NUR-SULTAN. QazAqparat – 20-21 jeltoqsan aralyǵynda elordada qazaq kúresinen VIII Álem birinshiligi ótkiziledi, dep habarlaıdy QazAqparat.

Uıymdastyrýshylaryń aıtýynsha, álemdik dodaǵa 33 memleketten 300-ge jýyq sportshy (erler men áıelder) qatysady dep josparlanǵan. «Daýlet» sport kesheninde ótetin baıraqty báseke barysynda erler 6 salmaq dárejesinje, áıelder 6 salmaq dárejesinde kúsh synasady.

Barlyǵy 12 salmaq dárejesinde júldeler sarapqa salynady.

«Qazaq kúresinen álem chempıonaty Birikken kúres álemi (United World Wrestling) uıymynyń 2019 jylǵa arnalǵan resmı kúntizbesine engen jáne jarystar tolyqtaı UWW resmı ókilderi men halyqaralyq dárejedegi tóreshileriniń qatysýymen ótkizilmek», delingen habarlamada.

Álem birinshiliginiń saltanatty ashylýy joǵaryda atalǵan sport keshende 20 jeltoqsan kúni saǵat 16.00-ge josparlanǵan.

El jankúıerleri Qazsport telearnasy arqyly dodaly jarystyń beldesýlerin tamashalaı alady.

Álem chempıonaty aıasynda alys-jaqyn shet elderdiń ókilderiniń qatysýymen Dúnıejúzilik «Qazaq kúresi» federatsııasynyń halyqaralyq kongresi ótedi. Jıynnyń kún tártibinde federatsııa alqa músheleriniń saılanýy jáne basqa da máseleler qarastyrylmaq.

Halyqaralyq kongress «Beıjiń Palas» qonaq úıiniń «Silk way» májilis zalynda 19-jeltoqsanda saǵat 11.00-de bastalady.

Jarysty uıymdastyrýshylar – Birikken kúres álemi UWW, Nur-Sultan qalasynyń ákimdigi, Dúnıejúzilik «Qazaq kúresi» federatsııasy.