Otyrarlyq sýretshi Táýelsizdik merekesine trıptıh kartınasyn usyndy

ShYMKENT. QazAqparat - Ońtústik Qazaqstan oblysynyń Otyrar aýdanynda QR Táýelsizdiginiń 25 jyldyq mereıli merekesine oraı «Táýelsizdik - babalardyń san ǵasyrlyq armany» atty taqyrypta saltanatty jıyn bolyp ótti, dep habarlaıdy aýdan ákimdiginiń baspasóz qyzmeti.

Merekelik shara aýdandyq Mádenıet saraıynyń foıesinde sýretshi Ádilhan Máliktiń «Otyrar - Ulylar Otany» taqyrybymen salynǵan trıptıh kartınasynyń ashylýynan bastaldy. «Táýelsizdik tuǵyrym» kitap kórmesi de usynylyp, kórme aıasynda jergilikti aqyndardyń shyǵarmalary jınaqtalǵan «Táýelsizdik tolǵaýy» kitabynyń tanystyrylymy boldy. Óner adamdarynyń shyǵarmashylyǵymen tanysyp bolǵan soń, arnaıy kelgen qonaqtar mýzeı ujymynyń etnografııalyq kórmesin tamashalady.
Negizgi jıyn tarıhymyzdan syr shertetin sahnalyq qoıylymmen bastaý alyp, Abylaı hannyń armanyn kórermenderine kórkem jetkize bildi. Saltanatty jıynda QR Investıtsııa jáne damý mınıstrligi, Kólik komıteti tóraǵasynyń orynbasary Maqajanov Nyǵmetjan Qoıshybaıuly men aýdan ákimi Erlan Aıtahanov otyrarlyqtardy arnaıy quttyqtady.
Jıynda aýdan basshysy Otyrar aýdanynyń áleýmettik-ekonomıkalyq, mádenı-rýhanı damýyna úles qosqan A.Balajan, Q.Báıshenov, Q.Bóribek, E.Bóribaev, S.Jańabaı, A.Jaqsybaev, Q.Jantóreeva, Q.Nurqulov, Á.Tóre, N.Ýaıstarǵa aýdannyń Qurmetti azamaty ataǵynyń kýáligi men tósbelgisin saltanatty jaǵdaıda tapsyrdy.
Sondaı-aq, el Táýelsizdiginiń nyǵaıýyna, aýdanymyzdyń ósip-órkendeýine qosqan úlesi úshin bir top sala sańlaqtary men aýyl aqsaqaldaryna aýdan ákiminiń Alǵys hatymen marapattaldy. Saltanatty jıyn sońy aýdan ónerpazdarynyń kontserttik baǵdarlamasymen jalǵasyn taýyp, kórermenderge merekelik kóńil-kúı syılady.