Otyrardaǵy Muhtar Shahanovtyń shyǵarmashylyq úıinde «Arys, biz birgemiz!» aktsııasy ótti
Muhtar Shahanovtyń bastamasymen ótken aktsııaǵa aýdan ákimi Erlan Aıtahanov qatysyp, óńir turǵyndarynyń qaıyrymdy isten qalys qalmaı atsalysyp jatqanyn jetkizdi.
«Kúni keshe oryn alǵan tilsiz jaýdyń saldarynan arystyq aǵaıyndardyń basyna túsip otyrǵan synaq otyrarlyqtardyń da kóńilin alańdatyp, júrekterin syzdatýda. Qaıyrymdy halqymyzǵa myń da bir raqmet! Elimizde qolǵa alynyp otyrǵan jan-jaqty qaıyrymdylyq isten otyrarlyqtar da tys qalmaýda. Ómirdiń aşy-tuşy dámin tatyp, ata-babalarymyzdyń izgi qasıetterin boıyna sińirgen aýdan aqsaqaldary Úndeý tastap, ıgi iske búkil aýdan turǵyndaryn shaqyrǵan bolatyn. Búgin Úndeýge ún qosqan otyrarlyqtar «Arys, biz birgemiz!» aktsııasyna qatysyp, bir kúndik jalaqylaryn arnaıy esep-shotqa aýdarýda», - dedi Erlan Aıtahanov.
Munan soń Muhtar Shahanov sóz sóılep, taǵdyrdyń synynda tózimdilik tanytqan arystyqtarǵa 500 myń teńge tapsyrdy.
«Bastaryna qıyn-qystaý kún týǵanda bir-birine baýyrmaldyq, qaıyrymdylyq, aýyzbirshiliktiń ozyq úlgilerin kórsetý halqymyzdyń qanynda bar asyl qasıet. «Tas túsken jerine aýyr» degendeı syn shaǵyndaǵy arystyq aǵaıyndardy sabyrǵa shaqyra otyryp, qıyndyqtar men aýyrtpalyqtardyń betin aýlaq qylsyn degen izgi tileımin», - dedi Muhtar Shahanov.
Arystyqtardyń basyna túsken qıyndyqtardyń bárin eńserip, qalanyń gúldenetinine senim bildirgen otyrarlyqtar bir kúndik aktsııaǵa óz úlesterin qosty. Aktsııa barysynda jınalǵan qarajattar Arys qalasyn qaıta qalpyna keltirý qoryna aýdarylatyn boldy.
