Otyrarda Táýelsizdiktiń 25 jyldyǵyna arnalǵan rýhanı keshter uıymdastyryldy

ShYMKENT. QazAqparat - Búgin el Táýelsizdiginiń 25 jyldyǵyna oraı Ońtústik Qazaqstan oblysynyń Otyrar aýdanyna qarasty Maıaqum aýylynda aýdandaǵy aqyn-jazýshylardyń basyn qosqan «Rýhanı murager» atty kesh ótti, dep habarlaıdy aýdan ákimdiginiń baspasóz qyzmeti.

Shırek ǵasyrlyq Táýelsizdigimizdi ulyqtaý, mádenı-rýhanı qundylyqtarymyzdy nasıhattaý, jergilikti aqyn-jazýshylarǵa qurmet kórsetý maqsatynda ótken sharaǵa qatysqan aýdan ákiminiń orynbasary Perdehan Japparqulov kópshilikti mereıli merekemen quttyqtap, arqaly aqyndardyń shyǵarmashalyǵyna tabys tiledi. Shara barysynda mádenıetimiz ben ádebıetimizdiń nar júgin kóterip júrgen óńirimizge belgili bir top aqyndar Egemendigimizdiń 25 jyldyǵy taqyrybyn shyǵarmalaryna arqaý etip, tyńdarmandardyń rýhyn bir kóterip tastasa, jergilikti ónerpazdar ásem ánderimen kóterińki kóńil-kúı syılady. Kesh sońynda aýyl aqsaqaly Aban Serim kópshilikti merekemen quttyqtap, aq batasyn berdi. Sonymen qatar, Kóksaraı aýylyndaǵy Mádenıet úıinde «Táýelsizdik tańy» atty merekelik kontsert ótti. Kesh sońy jergilikti ónerpazdardyń kontserttik baǵdarlamasymen jalǵasyn taýyp, patrıottyq ánder shyrqaldy.

Aıta keteıik, Qazaqstan Respýblıkasy Táýelsizdiginiń 25 jyldyǵyna oraı elimizdiń túkpir-túkpirinde merekelik mádenı, rýhanı is-sharalar kóptep ótkizilip jatyr.