Otyrarda Shahanovtyń shyǵarmashylyq úıi ashyldy
TÚRKІSTAN. QazAqparat - Túrkistan oblysy, Otyrar aýdanynda Muhtar Shahanovtyń shyǵarmashylyq úıi ashyldy. Aqynnyń týyp-ósken Shilik eldi mekeninde boı kótergen shyǵarmashylyq úıi bilim men ǵylymnyń, ádebıet pen ónerdiń ordasyna aınalmaq, dep habarlaıdy QazAqparat tilshisi.
Erekshe dızaınmen salynǵan úıdiń ishi de ózgeshe bezendirilgen. Aqynnyń balalyq shaǵynan búgingi kúnge deıingi ómir joly ár kezeńdegi sýrettermen, qujattarmen tolyqtyrylǵan. Shyǵarmashylyqpen aınalysatyn jumys kabınetteri, kitaphana, demalys jáne qonaq qabyldaıtyn bólmeler zaman talabyna saı jabdyqtalǵan. Ǵımarattyń ashylý saltanatynda oblys ákiminiń orynbasary Erbol Sadyr sóz sóılep, oblys ákimi Janseıit Túımebaevtyń aqyn aǵasyna degen ystyq yqylasqa toly quttyqtaýyn jetkizdi. Iyǵyna zerli shapan jaýyp, syı-sııapat kórsetti. Elbasymyz N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyń negizinde «Týǵan jerge taǵzym» aktsııasy aıasynda oblys kóleminde kóptegen ıgi sharalar atqarylǵanyn atap ótti. Solardyń biri osynaý ashylyp otyrǵan Shahanov úıiniń belgili metsenat Serikjan Seıitjanovtyń demeýshiligimen boı kótergenin jetkizdi.
Munan soń álem aqyny Muhtar Shahanov sóz alyp, óz ómirinen estelikter aıtty. Aqynnyń talantyna bas ıetin ónerpazdar onyń jańa óleńderin jatqa oqyp, ánderin áýelete shyrqady. Ashylý saltanatynan soń jınalǵan kópshilik Muhtar Shahanovtyń «Otyrar dastany» shyǵarmasynyń jelisimen túsirilgen anımatsııalyq fılmdi tamashalady.
