OTYRAR jáne GRIFFIN kollektsııalyq monetalar aınalysqa shyǵady
ASTANA. KAZINFORM — Ulttyq bank «Qazaqstandy monetalar arqyly zertte» serııasynan OTYRAR jáne «Kóshpendilerdiń ańyzdary men mıfteri» serııasy aıasynda GRIFFIN kollektsııalyq monetalaryn aınalysqa shyǵarady.
Monetalar 2026 jylǵy 8 qańtardan bastap QUB ınternet dúkeni arqyly satylady.
OTYRAR kollektsııalyq monetalary týraly
Otyrar – Qazaqstan tarıhyndaǵy biregeı arheologııalyq eskertkish, Ortalyq Azııanyń ejelgi qalalarynyń biri, Syrdarııa ózeniniń ańǵarynda ornalasqan Uly Jibek jolyndaǵy iri saýda-qolóner jáne mádenı ortalyǵy. Qala kerýen saýdasynyń, ǵylym men bilimniń mańyzdy ortalyǵy – fılosof Ábý Nasyr ál-Farabıdiń týǵan jeri retinde tanymal.
Monetada kórkemdelgen qalqan men ejelgi Otyrar qalasynyń kórinisi beınelengen. Monetanyń ústińgi jaǵynda qalanyń bekinis qaqpasy, qabyrǵalary men munaralary ornalasqan.
Moneta altyn jalatý tehnologııasyn qoldana otyryp, 925 synamaly kúmisten daıyndalǵan. Monetanyń massasy – 24 gramm, dıametri – 37 mm, sapasy – rroof, nomınaly – 1 000 teńge, taralymy – 2 000 (eki myń) dana.
Monetanyń beınesi
GRIFFIN kollektsııalyq monetalary týraly
Eýrazııanyń kóshpeli halqynda grıfon denesi arystan, basy búrkit beınesindegi mıfologııalyq qanatty tirshilik ıesi retinde kórinis taýyp, aspan men jer kúshiniń úılesimin bildirgen. Ańyzǵa aınalǵan mıfologııalyq janýar jasyrylǵan qazyna saqshysy jáne áskerı erliktiń, bılik pen kún energııasynyń belgisi bolǵan. Grıfon kóshpendilerdiń «ań stılinde» – altyn, qarý-jaraq, at ábzelderi men salt-joralyq áshekeılerinde kórinis taýyp, totemdik mánge ıe bolǵan.
Monetada ulttyq oıý-órnekpen kómkerilgen taýlardyń ústinde qalyqtap turǵan grıfon beınelengen. Artqy jaǵynda taý shyńdary trafaret tehnıkasymen bezendirilgen.
Monetalar altyn jalatý tehnologııasyn qoldana otyryp, 925 synamaly kúmisten daıyndalǵan. Monetanyń massasy – 31,1 gramm, dıametri – 38,61 mm, sapasy – rroof, nomınaly – 1 000 teńge, taralymy – 2 000 (eki myń) dana.
Monetanyń beınesi
Monetanyń Qazaqstan Respýblıkasynyń búkil aımaǵynda ózderiniń belgilengen qunymen tólemderdiń barlyq túri boıynsha qabyldanýǵa, sondaı-aq eldiń barlyq bankinde bank shottaryna esepke alynýǵa jáne aýdarylýǵa, usaqtalýǵa jáne aıyrbastalýǵa mindetti.
Kollektsııalyq monetalar Qazaqstan teńge saraıynda daıyndaldy.
Aıta ketelik Qazaqstan Ulttyq banki «Jaratylys syrlary» monetalar serııasynan MYSYRLYQ TANYM kollektsııalyq monetalaryn aınalysqa shyǵaratyny týraly jazǵan edik.