Otyrar qoryq-murajaıy tozyp barady - Q. Aıtahanuly
ASTANA. 7 maýsym. QazAqparat - Otyrar qoryq-murajaıynyń qural-jabdyqtary 30 jyldan astam ýaqyttan beri eskirip, tozyp, búgingi kúnge deıin esh jańǵyrtylmaǵan.
Búgin QR Parlamenti Cenatynyń jalpy otyrysynda Úkimet basshysynyń atyna saýal joldaǵan depýtat Qýanysh Aıtahanuly osy máseleni kóterdi.
«Elbasy N.Nazarbaevtyń tapsyrmasyna sáıkes júzege asqan «Mádenı mura» memlekettik baǵdarlamasy aıasynda Otyrar órkenıeti tereń zerttelip, el tarıhynyń І-shi ǵasyrynan bergi ómirinen syr shertetin myńdaǵan baǵa jetpes tarıhı jádigerler tabyldy. Bul mádenı-arheologııalyq eskertkishter qalpyna keltirilip, keleshek urpaqtyń rýhanı ıgiligine aınalýda. Osy jumystardy oryndaýǵa eleýli úles qosyp otyrǵan mádenı-tarıhı obektilerdiń biri Otyrar memlekettik arheologııalyq qoryq-murajaıy. Jyl saıyn qoryq-murajaıǵa elimizdiń túkpir-túkpirinen jáne alys-jaqyn shetelderden júz myńdaǵan týrıster kelip tarıhı muralarymen, jádigerlerimen tanysady. Alaıda, qoryq-murajaıynyń qural-jabdyqtary 30 jyldan astam ýaqyttan beri eskirip, tozyp, búgingi kúnge deıin jańǵyrtylmaǵan», - deıdi senator.
Onyń aıtýynsha, qazirgi kezde, murajaı ǵımaratynyń ekspozıtsııa zaldaryn zamanaýı jabdyqtaý qajettiligi týyndaıdy. Murajaı ǵımaratyn suıyq otynmen jylytatyn jeke qazandyq ornatý jáne uzaq jyldardan beri jóndeý kórmegen Ádebıet jáne óner bóliminiń ǵımaratyn aǵymdaǵy jóndeýden ótkizý qajet. «Osyǵan oraı, 2013 jylǵa arnalǵan respýblıkalyq bıýdjetti qalyptastyrý barysynda Otyrar memlekettik arheologııalyq qoryq-murajaıynyń tolyqqandy jumys isteýine qajetti 126 449 myń teńge qarjyny bólinse ıgi», - deıdi senator Q. Aıtahanuly.
