Otyrar ejelgi qalashyǵyn qalpyna keltirý jumystary aıaqtaldy
Ǵalymdar ejelgi qalashyq aýmaǵynda Aq Orda bıleýshisi Erzen han salǵan Hanakanyń ornyn tapty. Sondaı-aq, mamandar kúıdirilgen kirpishten qalanǵan meshit pen XV ǵasyrdyń basynda Ámir Temir Toqtamys hannyń elshilerin qabyldaǵan Berdibek saraıyn ishinara restavratsııalady, «Jaraqty», Soltústik jáne Sopyhan qaqpalaryn tolyǵymen qalpyna keltirdi.
Qalaǵa «Jaraqty» qaqpasy arqyly kirgen tusta turǵyn úıler men qysh sheberhanasy bar keshen tabyldy. Turǵyn úılerdiń mańynda óndiris oryndary ornalasqan, onda qysh ydystar jasalatyn eki kameraly pesh pen qysh buıymdar keptiriletin alań anyqtaldy. Ǵalymdar turǵyn úılerdegi sheberhanalar XV-XVI ǵasyrlarda jumys istegenin aıtady. Sondaı-aq, XVII ǵasyrdaǵy bazar alańynda da qazba jumystary júrgizildi, onda naýbaıhana kesheni jáne turǵyn úı oramy anyqtalyp, restavratsııalaý men konservatsııalaý jumystary júrgizildi.
Úsh jylǵa sozylǵan aýqymdy joba aıasynda eskertkishterdi saqtaý jáne týrısterdiń qaýipsizdigin qamtamasyz etý úshin Otyrar qalasynyń aýmaǵynda beınebaqylaý kameralary ornatyldy, kósheler elektr shamdarymen jaryqtandyryldy, jaıaý júrginshiler men elektrokarlarǵa arnalǵan joldar salyndy, týrısterdiń demalýyna arnalǵan oryndyqtar, sýburqaqtar, modýldik dárethanalar men qoqys jáshikteri ornatyldy.
Otyrar qalashyǵyn ishinara qalpyna keltirý jobasy boıynsha jumys nátıjelerimen tanysý barysynda Dáýren Abaev týrbıznes ókilderimen kezdesti. Jıynda mınıstr «Uly Jibek joly» týryn uıymdastyryp, jetildirý boıynsha tapsyrma berdi.
«Otyrar qalashyǵynyń aýmaǵynda aýqymdy jumys atqaryldy. Endi Almaty Taraz, Shymkent, Túrkistan sııaqty qalalardy jáne ońtústik óńirdiń barlyq negizgi mádenı-tarıhı obektilerin qamtıtyn «Uly Jibek joly» grand-marshrýtyn qurý qajet. Týrısterge Tarazdaǵy Aısha bıbi, Babadja hatýn, Tekturmas kesenelerin, odan ári Shymkenttegi Ibrahım ata kesenesi men tsıtadeldi, Túrkistandaǵy Arystan bab jáne Ahmet ıAssaýı keseneleri, keıin Otyrar jáne Saýran qalashyqtary sııaqty tarıhı-mádenı nysandar kiretin týrıstik baǵyt usyný qajet. Eger týrpaketter durys uıymdastyrylsa, bul baǵyt sheteldikter úshin ǵana emes, jergilikti týrıster úshin de qyzyqty bolady», - dedi Dáýren Abaev.
Óz kezeginde otandyq týroperatorlar halyqty 1-7 kún ishinde kıeli jáne tarıhı oryndarǵa aparý boıynsha týrlar usynýǵa daıyn ekenin jetkizdi.
Aıta keteıik, endi Otyrar qalashyǵy ashyq aspan astyndaǵy mýzeı retinde jumys istep, týrısterdi qabyldaıdy.
Foto: gov.kz
