Otyrar aýdanynyń bir top qarııasy Áziret Sultan kesenesine zııarat etti
OTYRAR. QazAqparat – Túrkistan oblysy, Otyrar aýdanynda Qarttar kúnine oraı bir top qarııalarǵa kıeli jerlerge saıahat uıymdastyryldy. Aýdan ákimi Ábdiǵalı Júnisov bastaǵan qazynaly qarııalar avtobýspen tórt qaqpaly Túrkistanǵa bet aldy, dep habarlaıdy QazAqparat tilshisi.
Otyrarlyq qarııalar oblys ortalyǵy Túrkistan qalasyndaǵy Áziret Sultan kesenesine zııarat etti. Jańartylǵan, jańǵyrǵan mýzeı eksponattarymen tanysyp, Túrkistan tarıhynan tereń maǵlumattar aldy. Erekshe áserge bólengen zeınetkerler sondaı-aq, qaladaǵy qurylys jumystarymen de tanysty. Qazynaly qarııalar otyrarlyqtarǵa tıesili 9-sektorǵa arnaıy baryp, bolashaqta qalaǵa kórik beretin ári shilińgir shildede saıa bolatyn tal kóshetterin otyrǵyzdy. Ózderine arnaıy jaıylǵan dastarhannan dám tatyp, rızashylyqtaryn bildirdi. Dám ústinde birqatary aýdan ákimi men máslıhattyń jáne ardagerler keńesiniń alǵys hattarymen, káde syılarmen marapattaldy. Qaıtar jolda «Gaýhar-ana» kesenesine zııarat etken aýdan ardagerleri aýylǵa kóterińki kóńil-kúımen jetti.
