Otyrar aýdanyndaǵy mektepterdiń materıaldyq bazasy jetilip keledi
OTYRAR. QazAqparat – Túrkistan oblysy, Otyrar aýdanynda mektepterdiń materıaldyq bazasy jyl saıyn artyp keledi. Bul týraly ustazdardyń tamyz keńesinde aıtyldy, dep habarlaıdy QazAqparat tilshisi.
Bıylǵy jyly Kóksaraı aýylyndaǵy M.Áýezov atyndaǵy jalpy orta mektep kúrdeli jóndeýden ótse, Myńshuqyr eldi mekeninde 300 oryndyq bilim oshaǵy paıdalanýǵa beriledi dep kútilýde. Sondaı-aq, ótken oqý jylynda Sh.Qaldaıaqov, Jambyl, Ó.Jánibekov, M.Áýezov mektepteriniń rabototehnıka pán kabınetterine kompıýterler men ınteraktıvti taqtalar, noýtbýktar alynǵan.
Keńeste sóz alǵan aýdan ákimi Ábdiǵalı Júnisov bilim salasy qyzmetkerleri men ulaǵatty ustazdardy jańa oqý jylymen quttyqtap, aldaǵy josparlarymen bólisti.
«Bizge oqýshylardyń robot tehnologııasyn meńgerip qana qoımaı ony is júzinde kórsete bilýi mańyzdy. Máselen, aýdanymyzdaǵy «Otyrar Et-Sút» kásipornyna daıyn ónimderdi bólip, qaptap, arnaıy belgilerin japsyratyn zamanaýı tehnologııa qajet. Men osy sátti paıdalanyp bilimge qushtar jas ǵalymdarymyzǵa tapsyrys berýge daıyn ekendigimdi aıtqym keledi»,-dedi Ábdiǵalı Júnisov.
Sala mamandarynyń sózinshe, jańa oqý jylynda aýdandaǵy bilim beretin 40 mektepte alǵashqy qońyraý soǵylyp, 12032 oqýshy mektepke barady. Al, 1400 oqýshy 1-shi synypqa qabyldanyp, mektep tabaldyryǵyn attaǵaly otyr.
Sondaı-aq aýdandyq bilim bólimine qarasty barlyq bilim mekemelerinde 2030 muǵalim qyzmet etýde. Bıylǵy jyly jańartylǵan bilim berý mazmuny boıynsha 1585 muǵalim biliktiligin arttyrǵan.
Іs-shara barysynda ustaz degen uly esimge kir keltirmeı, shákirt tárbıeleý isinde jemisti eńbek etip júrgen pedagogtar mınıstrliktiń arnaıy tósbelgilerimen, aýdan ákimi men aýdandyq máslıhat hatshysynyń, sondaı-aq oblystyq adamı áleýetti damytý basqarmasynyń «Alǵys hattarymen» marapattaldy.
