Otyrar aýdanynda jańa ındýstrıaldy aımaq qurylady
Jobaǵa aımaqtan qazirgi tańda 97 gektar jer qarastylyp otyr. Qurylǵaly otyrǵan ındýstrıaldy aımaqtyń jalpy quny 1 mlrd. 359 mln. teńgeni quraıdy. Atalǵan aımaqtyń iske qosylýy otandyq jáne sheteldik ınvestorlardy tarta otyryp, óńdeý ónerkásibin damytýǵa zor múmkindikter bermek. Bul týraly OQO óńirlik kommýnıkatsııalar qyzmetinde ótken brıfıngte Otyrar aýdanynyń ákimi Erlan Aıtahanov málim etti.
Aýdan basshysynyń aıtýynsha, ótken jyly óńirde óndirilgen jalpy ishki ónim kólemi 53 mlrd. 884 mln. teńgeni quraǵan. Aǵymdaǵy jyly aýdan ekonomıkasynyń ishki ónim kólemin 61 mlrd. teńgege jetkizý josparlanýda.
«2017 jyly aýdannyń ónerkásip oryndarynda 16 mlrd. 152 mln. 400 myń teńgeniń ónimi óndirilgen. Bıyl atalǵan salada 17 mlrd. 600 mln. teńgeniń ónimin óndirip, naqty kólem ındeksin 104,4 paıyzǵa jetkizý josparlanyp otyr. Sondaı-aq, ótken jyldyń negizgi kapıtalyna tartylǵan ınvestıtsııa kólemi 13 mlrd. 898 mln. 900 myń teńgeni qurap, oblystaǵy aýdannyń úlesi 2,9 paıyzǵa jetti», - dedi Erlan Qýanyshuly.
Sonymen qatar, «Bıznestiń jol kartasy 2020» baǵdarlamasy aıasynda aýdanda aǵymdaǵy jyly 7 joba júzege aspaq. Kásipkerlik salasynda jalpy statıstıkalyq málimetke sáıkes, aýdandaǵy tirkelgen sýbektiler sany - 4556 bolsa, onyń 90 paıyzy búginde jumys istep tur.
Budan bólek, aımaqta osy ýaqytqa deıin «100 naqty qadam» Ult josparyna boıynsha 826 usaq sharýashylyqtardy biriktiretin 48 aýyl sharýashylyq kooperatıvteri qurylǵan. Aýdandaǵy aýyl sharýashylyǵy jalpy ónim kólemi ótken jyly 16 mlrd. 506 mln. teńgeni qurasa, bıyl bul mejeni 20 mlrd. 826 mln. teńgege jetkizý kózdelýde.
Qurylys salasynda aǵymdaǵy jyly 16 nysan qarastyrylǵan. Onyń ishinde 9-y kúrdeli jóndeýge, 7 nysan aǵymdaǵy jóndeýge usynyldy.
«Jeke turǵyn úı qurylysyn paıdalanýǵa berý jumystary boıynsha bıylǵy jospar oblystyq qurylys basqarmasymen 11 myń sharshy metr bolyp belgilengen. І-toqsanda bul kórsetkish 2484 sharshy metrge oryndalyp, ótken jyldyń esepti kezeńimen salystyrǵanda 124,4 paıyzdy qurady. 2018-2020 jyldary jalpy aýdany 18,5 myń sharshy metrlik 362 páter paıdalanýǵa beriletin bolady», - dedi Erlan Aıtahanov.
Infraqurylym salasynda aýdan kólemindegi 22 eldi mekenge gaz júıesin júrgizý úshin jobalyq smetalyq qujattar daıyndaýǵa bıýdjetten qarjy bólingen. Qazirgi tańda Sháýildir jene Temir aýyldarynda qurylys jumystary bastaldy. Otyrar aýdanyndaǵy 38 eldi mekenniń 25-i ortalyqtandyrylǵan qubyr sýymen, 6-y «Qazaqstan Temir Joly» AQ arqyly aýyz sýmen qamtylsa, 7 eldi meken qudyq jáne uńǵy sýyn paıdalanady.
Búgingi tańda óńirde bilim berý uıymdarynyń jalpy sany - 40, tıptik jaıda ornalasqany - 27, yńǵaılastyrǵan jaıda - 13 mektep bar. Aýdan kóleminde apatty jáne 3 aýysymdy mektepter joq.
Aıta keterligi, Otyrar aýdanynda halyqty jumyspen qamtamasyz etýdiń 2018 jylǵy keshendi jospary boıynsha 2500-ge jýyq adamdy jumyspen qamtý mejelengen.
