Otyrar aýdanynda ustazdarǵa erekshe qurmet kórsetildi
OTYRAR. QazAqparat – Túrkistan oblysy Otyrar aýdanynda «Ustazdar kúni» qarsańynda «Ustaz – nurdyń shýaǵy» atty merekelik shara ótti. Saltanatty jıynda aýdan ákimi Ábdiǵalı Júnisov pen aýdandyq máslıhattyń hatshysy Myrzahan Manapovtar quttyqtaý sóz sóılep, aǵartý salasynyń mamandaryna izgi tilekterin jetkizdi, dep habarlaıdy QazAqparat tilshisi.
Merekelik jıynda aýdan basshysy urpaq tárbıesinde eseli eńbek etip júrgen bir top ustazdar qaýymyn oblystyq bilim basqarmasy men aýdan ákimdigi atynan Alǵys hattarymen marapattady. Al, aýdandyq bilim qyzmetkerleri kásipodaǵynyń tóraǵasy Egemberdi Qasym birneshe bilim salasynyń ókilderine bilim qyzmetkerleri kásipodaǵynyń tósbelgisi men Qurmet gramotasyn tabystady.
«Shákirtterin bilim nárimen sýsyndatyp, adamgershilik rýhta baǵyt-baǵdar berip júrgen ulaǵatty ustazdarymyzdyń eńbegi qashan da eleýli. Barsha mamandyqtyń anasy sanalatyn muǵalimdik jumys qajyrly qaırat pen shydamdylyqty, tereń bilimdi qajet etedi. Kez kelgen elde órkenıetke bastar jol – mektep desek, mekteptiń basty tulǵasy, mekteptiń júregi – muǵalim. Ustazyn ulyqtaǵan otyrarlyqtar atynan sizderdi tól merekelerińizben shyn júrekten quttyqtaımyn»,- dedi Ábdiǵalı Júnisov.
«Ustaz – nurdyń shýaǵy» taqyrybymen ótken merekelik sharada aýdandyq máslıhattyń tóraǵasy da ystyq yqylasyn bildirdi.
«Muǵalim ár adamnyń júreginen úlken oryn alady. El bolashaǵy - jastar desek, sol jastardyń sapaly bilim, sanaly tárbıe alyp, jaqsy maman bolýyna birden-bir sebepker ustaz ekendiginde daý joq»,- dedi Myrzahan Manapov.
Shara barysynda sondaı-aq aýdan ónerpazdary merekelik kontsert qoıdy. Ánnen shashý shashylyp, myń buralǵan bıshiler óner kórsetti.
