Otyrar aýdanynda sport kúni atalyp ótti
ShÁÝІLDІR. QazAqparat – Túrkistan oblysynyń Otyrar aýdanynda sport kúni joǵary deńgeıde atalyp ótti. Sport salasy mamandarynyń kásibı merekesine aýdan ákiminiń mindetin atqarýshy Ábdiǵalı Júnisov pen aýdandyq máslıhat hatshysy Myrzahan Manapov arnaıy qatysyp, aýdan sportshylaryn tól merekemen quttyqtady, dep habarlaıdy QazAqparat tilshisi.
Búginde aýdan sportyn elimiz ben halyqaralyq arenalarda tanytyp júrgen jas sportshylar kóbeıip keledi. Olardyń qatarynda erkin kúresten aýyl sportshylary arasyndaǵy QR chempıonatynyń jeńimpazy Rahat Qýatuly men belbeý kúresinen álem chempıonatynyń kúmis júldegeri Jumajan Ázimjanuly, qazaq kúresinen QR chempıonatynyń kúmis júldegeri Ádil Serikuly men qazaq kúresinen QR chempıonatynyń qola júldegeri Jasulan Jeńishanuly, grepplıngten Azııa Oren jarysynyń qola júldegeri Álıhan Birjanuly men toǵyzqumalaqtan QR Birinshilikteriniń jeńimpazy Gúlnaz Erbolqyzy, voleıboldan QR chempıonatynyń júldegeri Qundyzaı Ábilbekqyzy men ústel tennısinen QR chempıonatynyń júldegeri Mádı Qalıuly, basketboldan sport sheberine úmitkerler Jantolqyn Dúısenbaıqyzy men Aqerke Asqarqyzy sekildi sport sańlaqtary bar. Olardyń esimin maqtanyshpen aıtýǵa bolady.
Merekelik shara barysynda sport salasynyń qyzmetkerleri men aýdan sportyna eńbek sińirgen jattyqtyrýshylar jáne bir top sport sańlaqtary aýdan ákiminiń alǵys hatymen marapattaldy. Sondaı-aq merekelik jıynda oblystyq sport basqarmasynyń, aýdandyq máslıhat hatshysynyń, «Nur Otan» partııasy Otyrar aýdandyq fılıalynyń qurmet gramotalary men sport bóliminiń alǵys hattary da tabystaldy. Sonymen qatar sharada «Otyrar qorǵanysyna 800 jyl» tolýyna oraı uıymdastyrylǵan 40 jastan asqan ardager sportshylar arasynda fýtzaldan ótken Otyrar aýdany birinshiliginiń jeńimpazdary men úzdik oıynshylary da anyqtalyp, baǵaly syı-syıapatqa ıe boldy.
Merekelik shara sońy aýdan ónerpazdarynyń kontserttik baǵdarlamasyna ulasty.
