Otyrar aýdanynda nysandardyń kúzgi-qysqy maýsymǵa daıyndyǵy pysyqtaldy
OTYRAR. QazAqparat - Túrkistan oblysy, Otyrar aýdanynda máslıhattyń kezekti qyryq altynshy sessııasy ótti. Sessııaǵa aýdan ákimi Ábdiǵalı Júnisov pen orynbasarlary, máslıhat depýtattary, mekeme-kásiporyn basshylary men BAQ ókilderi qatysty, dep habarlaıdy QazAqparat tilshisi.
Máslıhattyń kún tártibinde aýdan ákimine júktelgen mindetter men fýnktsııalardy atqarýy týraly esebi men aýdandaǵy áleýmettik, mádenı-turmystyq nysandardyń kúzgi-qysqy maýsymǵa daıyndyǵy pysyqtaldy. Aýdan ákimdigi janyndaǵy komıssııalardyń quramdaryna ózgerister engizý sekildi máseleler qoıyldy. Sessııada aýdan basshysy Ábdiǵalı Júnisov aǵymdaǵy jyldyń 8 aıynda aýdan kóleminde atqarylǵan jumystar jóninde arnaıy baıandama jasady. Onyń sózinshe, aýdan bıýdjetiniń kiris bóligi 8 aıda 115,4 paıyzǵa, ónerkásip salasynyń naqty kólem ındeksi 103,7 paıyzǵa artqan. Al, óndirilgen ishki aımaq ónim kólemi 97,2 paıyz, aýyl sharýshylyq salasynyń 8 aıda naqty kólem ındeksi 102,0 paıyzdy quraǵan. Sýarmaly jer kóleminiń artqandyǵyn tilge tıek etken Ábdiǵalı Aıtjanuly bıyl jyl sońyna deıin áleýmettik mańyzǵa ıe birneshe qurylys nysandarynyń jumysy aıaqtalyp, el ıgiligine paıdalanýǵa beriletindigin jetkizdi. Sessııada jaryssózge shyqqan halyq qalaýlylary Jolbarys Myrzapeıis pen Tóre Aqjigitter balabaqsha, kóshelerdi jóndeý, sporttyq alańdar salý, kanal, jylý berý maýsymyna daıyndyq jáne aýdannyń aýyl sharýashylyq salasynda mal azyǵyn daıyndaýdy sekildi usynys-saýaldaryn bildirdi. Óz kezeginde aýdan basshysy depýtattardyń kótergen máselelerinen ózi de habardar ekendigin aıtyp, aıtylǵan usynystardyń aldaǵy ýaqytta kezeń-kezeńimen óz sheshimin tabatyndyǵyn basa aıtty. Jıynda sóz alǵan aýdandyq turǵyn-úı,kommýnaldyq sharýashylyq jáne avtomobıl joldary bóliminiń basshysy Asylhan Qudaıbergenov qysqa daıyndyq, jylý berý máselelerine baılanysty habarlama jasady.
