Otyrar aýdanynda «Bilimge bastar jol» qaıyrymdylyq aktsııasy ótti
OTYRAR. QazAqparat – Túrkistan oblysynyń Otyrar aýdanynda jalpy respýblıkalyq «Bilimge bastar jol» qaıyrymdylyq aktsııasy uıymdastyryldy.
Aýdandyq Jastar resýrstyq ortalyǵy ótkizgen sharada 30-ǵa jýyq oqýshyǵa mektepke qajetti oqý quraldary men sómkeler tabystaldy, dep habarlaıdy QazAqparat tilshisi.
Bıylǵy oqý jylynda aýdanda 40 mektepte alǵashqy qońyraý soǵylyp, 12032 oqýshy altyn uıasynda bilim alady. 1400 oqýshy 1-shi synypqa qabyldanyp, mektep tabaldyryǵyn attaǵaly otyr.
Osyǵan oraı atalǵan sharaǵa aýdan ákimi Ábdiǵalı Júnisov arnaıy qatysyp, oqýshylardy alda kele jatqan bilim kúnimen kuttyqtady. Shara barysynda oqýshylar men olardyń ata-analaryna arnaıy dastarhan jaıylyp, aýdan ónerpazdarynyń ásem ánderi tartý etildi.
«Aǵa býynnyń qamqorlyǵy, óskeleń urpaqtyń ózgelerge úlgi bolýy burynnan ómir saltymyzda bar úrdis. Osy ini-qaryndastarymyzǵa qamqorlyq pen jomarttyq tanytyp júrgen aýdanymyzdyń belsendi jastary men kásipkerlerine alǵys aıtamyn», – dedi Ábdiǵalı Júnisov.
Іs-sharany aýdandyq máslıhat depýtaty A.Asan qorytyndylap, kelgen oqýshylar men olardyń ata-analaryna táttiler usynyldy.
