Otyrar aýdany bıýdjetiniń kiris bóligi 115,4 paıyzǵa artqan
OTYRAR. QazAqparat – Túrkistan oblysy, Otyrar aýdanynda máslıhattyń kezekti otyrysy ótti. Sessııaǵa aýdan ákimi Ábdiǵalı Júnisov pen orynbasarlary, máslıhat depýtattary men mekeme, kásiporyn basshylary men BAQ ókilderi qatysty, dep habarlaıdy QazAqparat tilshisi.
Máslıhattyń kún tártibinde aýdan basshysy Ábdiǵalı Júnisov aǵymdaǵy jyldyń 8 aıynda atqarǵan jumystary jóninde arnaıy baıandama jasady. Ákimniń sózinshe, aýdan bıýdjetiniń kiris bóligi 8 aıda 115,4 paıyzǵa, ónerkásip salasynyń naqty kólem ındeksi 103,7 artqan. Al, óndirilgen ishki aımaq ónim kólemi 97,2 paıyzǵa, aýyl sharýshylyq salasynyń naqty kólem ındeksi 102,0 paıyzdy quraǵan. Aýdandaǵy sýarmaly jer kóleminiń artqandyǵyn tilge tıek etken Ábdiǵalı Aıtjanuly bıyl jyl sońyna deıin áleýmettik mańyzǵa ıe birneshe qurylys nysandarynyń jumysy aıaqtalyp, el ıgiligine paıdalanýǵa beriletindigin jetkizdi. Sessııada sondaı-aq, aýdandaǵy áleýmettik, mádenı-turmystyq nysandardyń kúzgi-qysqy maýsymǵa daıyndyǵy men aýdan ákimdigi janyndaǵy komıssııalardyń quramdaryna ózgerister engizý sekildi máseleler qoıyldy. Máslıhat otyrysynda jaryssózge shyqqan halyq qalaýlylary Jolbarys Myrzapeıis pen Tóre Aqjigitter balabaqsha, kóshelerdi jóndeý, sporttyq alańdar salý, kanal, jylý berý maýsymyna daıyndyq máselelerin kóterdi. Aýyl sharýashylyq salasynda mal azyǵyn arttyrý maqsatynda arpa egý sekildi usynys-saýaldaryn bildirdi. Óz kezeginde aýdan basshysy depýtattardyń kótergen máseleleri men aıtylǵan usynystardyń aldaǵy ýaqytta kezeń-kezeńimen óz sheshimin tabatyndyǵyn basa aıtty. Jıynda sóz alǵan aýdandyq turǵyn-úı,kommýnaldyq sharýashylyq jáne avtomobıl joldary bóliminiń basshysy Asylhan Qudaıbergenov qysqa daıyndyq, jylý berý máselelerine baılanysty habarlama jasady.
