Otyrar aýdandyq emhanasyda qaterli isikti aıqyndaýdyń jańa júıesi qolǵa alyndy

Nátıjeinde aýdan turǵyndary obyr aýrýynyń belgileri bar-joǵyn bir kúnde bile alady, dep habarlaıdy QazAqparat tilshisi.

Shalǵaı aýdanda ornalasqan emdeý mekemesi qyzmetkerleriniń bundaı bastamalaryn kórýge «Qazaq onkologııa jáne radıologııa ǵylymı-zertteý ınstıtýtynyń» dırektory Dılıara Haıdarova men bas dárigeri Nurlan Baltabekovtyń jáne elimizdiń barlyq onkologııalyq ortalyqtarynyń bas dárigerleri keldi.

«Halyqaralyq qaterli isikpen kúres kúnine» oraı onkúndik aıasynda is-saparmen kelgen jumysshy tobynyń ókilderi aldymen úılestirý keńesinde bas qosyp, sońynan jergilikti deńgeıde qaterli isik aýrýymen kúrestiń qalaı júrgizilip jatqandyǵyn tekserdi.

Otyrar aýdandyq emhanasynyń bas dárigeri Raıymbek Tasyrbaevtyń aıtýynsha, naýqasta qaterli isik belgileri baıqalǵan jaǵdaıda ol birden jasyl dálizge ótkiziledi. Ol adam shuǵyl túrde bir kúnniń ishinde barlyq qajetti tekserýden ótedi. Qolyna jasyl bilezik taǵylyp, kezeksiz jáne barlyǵy da dárigerdiń tikeleı bastan aıaq baqylaýymen júrgiziledi. Júzege asyrylyp jatqan pılottyq joba búginde bilikti dárigerler tarapynan qoldaý tapqan. Sebebi, aýrýdy asqyndyrmaı der kezinde anyqtaý óte mańyzdy. Ókinishke qaraı, onkologııalyq dertke shaldyqqan azamattardyń 70 paıyzy dárigerge aýrýdyń tómengi satylarynda kórinedi. Búgingi tańda aýdanda 209 naýqas dál osy aýrýmen esepte turady.

Dárigerlermen kezdesý barysynda «Qazaq onkologııa jáne radıologııa ǵylymı-zertteý ınstıtýtynyń» bas dárigeri Nurlan Baltabekov emhana mamandarynyń biliktilik deńgeılerin tekserdi. Ózi dárigerge kelip kórinýshi retinde otyryp, barlyq kabınetterdiń qandaı dárejede ekendigin kórip shyqty. Emhana mamandaryna dál emtıhandaǵydaı suraqtar qoıyp, jaýaptaryn tyńdady. Nátıjesi boıynsha Otyrar aýdandyq emhanasy qyzmetkerleriniń bilim deńgeıi de joǵary baǵalandy.

Aıta keteıik, oblys boıynsha 8 myńnan astam adam qaterli isik aýrymen tirkelgen. Keń taraǵan túrleri bul – sút bezi, ókpe, baýyr, asqazan obyry sanalady. Onkologııalyq naýqastardyń jas erekshelikteri kóbinese 55 - 79 jas aralyǵynda bolyp tur.