Otynnyń quny óndiriletin energııanyń baǵasyna eleýli túrde áser etip otyr
ASTANA. 16 sáýir. QazAqparat - Búgin QR Parlamenti Májilisinde ótken Úkimet saǵatynda Ekonomıkalyq reforma jáne óńirlik damý komıtetiniń tóraǵasy Seıitsultan Áıimbetov otynnyń quny óndiriletin energııanyń baǵasyna eleýli túrde áser etip otyrǵanyn málim etti.
«Ekibastuz GRES-1 iri stansasyn mysalǵa alsaq, statıstıka derekteri boıynsha 2009 jyly shekti tarıf bir kVt/saǵat úshin 3,6 teńgeni qurasa, 2012 jyly - 6,5 teńge boldy, ıaǵnı onyń 2,9 teńgege nemese 80 paıyzǵa ulǵaıǵany kórinip tur. Osyndaı uqsastyq jylý energııasynda da baıqalady. Sonymen qatar, óndirilgen elektr energııasyna jumsalǵan otynnyń úlestik shyǵyny men negizgi óndirýshiler óndirgen kómirdiń baǵasy da ósýde. Eger negizgi óndirýshilerdiń tórt sýbektisi boıynsha kómir baǵasy 2009 jyly orta eseppen bir tonnasy 941 teńgeni qurasa, 2011 jyly ol eki esege ósken», - deıdi Seıitsultan Áıimbetov.
Onyń aıtýynsha, elektr jáne jylý energııasyn óndirý qyzmetterine arnalǵan tarıfterde otynnyń quramdastary (kómir, mazýt, gaz) basymdyqpen paıdalanylyp otyr. Bular shamamen 70 paıyzdy quraıdy. Depýtat osyǵan oraı otynnyń quny óndiriletin energııanyń baǵasyna eleýli túrde áser etetinin aıtyp, bul rette memleketpen kómirdiń, mazýttyń baǵalary rettelmegenin alǵa tartty. «Osyndaı jaǵdaı avıakerosınge de qatysty bolyp tur, munyń ózi respýblıkanyń ishki naryǵyndaǵy onyń baǵasynyń kúrt sharyqtap ketýine ákep soqty. Bul, óz kezeginde, avıabıletter baǵasynyń qymbattaýyna ákelýde, óıtkeni avıakerosınniń avıatasymaldaý tarıfindegi yqpaly 30 paıyz mólsherin quraıdy. Sondyqtan, Úkimet pen tıisti ýákiletti organdar elektrmen, jylýmen jabdyqtaý jáne jolaýshylar tasymaly jónindegi áleýmettik mańyzy bar qyzmetterge tarıfterdiń ósýin tejeý úshin osy máseleni jan-jaqty qaraýlary tıis. Bizdiń oıymyzsha, tutynýshylar men otyn óndirýshi, ótkizýshi uıymdar múddeleriniń teńdestigin qamtamasyz etý qajet», - deıdi S. Áıimbetov.
