Otynǵa aıyrbas retinde Iran ýran baıytýdy toqtatpaq
ASTANA. Aqpannyń 10-y. QazAqparat - Eger Batys qajetti ıadrolyq otyndy jetkizip otyratyn bolsa, Iran ýrandy 20 paıyzǵa deıin baıytýdy toqtatady.
Irannyń Atom energııasy jónindegi agenttiginiń basshysy Álı Akbar Salehı osyndaı málimdeme jasady, dep habarlaıdy «Maıak» radıosy.
Onyń aıtýynsha, ıadrolyq otynmen almasý týraly kelissóz úshin esik ashyq. Salehı, keshe Iranda ýrandy 20 paıyzǵa deıin baıytý úderisi bastalǵanyn qýattady. Tegrannyń málim etýinshe, bul jumystar Natanzedegi ıadrolyq ortalyqta MAGATE ınspektorlarynyń baqylaýymen júrip jatyr.
Al AQSh ókimeti bolsa, Irannyń ıadrolyq baǵdarlamasyna baılanysty ol elge qarsy jańa «mańyzdy» sanktsııalar ázirleýde. AQSh Prezıdenti Barak Obama Aq úıde keńeste sóılegen sózinde osyndaı málimdeme jasady.
Amerıka prezıdentiniń aıtýynsha, jańa sanktsııalardy ázirleý úderisi jedel júrip jatyr. Degenmen B.Obama, jańa sanktsııalardyń naqty engiziletin merzimin ataǵan joq.
Oǵan qosa Prezıdenttiń pikirinshe, Irannyń ýrandy 20 paıyzǵa deıingi baıytýdy bastaý týraly sheshimi Tegrannyń halyqaralyq qoǵamdastyqpen dıalogtan bas tartýynyń aıǵaǵy. B.Obama ıran ókimetiniń saıasaty adamzatqa qaýip tóndiretin ıadrolyq qarýdyń óndirisine baǵyttalyp otyrǵanyn taǵy da atap ótti.
