Otyn, aqsha, kıim-keshek: Petropavlda qarttar men múgedekterge qaıyrymdylyq kórsetildi
Qazir Petropavl qalasynda 44 myńnan astam zeınetker, 11 myńǵa jýyq múmkindigi shekteýli jan turady. Ekinshi dúnıejúzilik soǵystyń 48 ardageri, 3402 tyl eńbekkeri, maıdangerlerdiń 259 jesiri, Lenıngradty azat etýge qatysqan – 6 jáne kámeletke tolmaı fashıstik kontslagerlerge túsken 16 adam turady.
Petropavl qalasy ákiminiń baspasóz qyzmetinen málim etkendeı, qazan aıy boıy qarttar men múgedekterdi qoldaý aılyǵy aıasynda 300-den astam is-shara uıymdastyryldy. Onyń ishinde túrli kezdesýler, sporttyq is-sharalar, kontserttik baǵdarlamalar bar. Máselen, 1 qazanda Jastar saraıynda merekelik kesh ótti. Bul kúni zeınetkerler qalaishilik qoǵamdyq kólikte tegin júrýge múmkindik aldy.
Medıtsınalyq mekemelerde «Ashyq esik kúni» ótti. Bir aı boıy barlyq oqý oryndarynda, eńbek ujymdarynda, uıymdarda kezdesýler uıymdastyryldy. Jalǵyzbasty, júre almaıtyn jandar nazardan tys qalmaı, olarǵa da materıaldyq kómek kórsetildi.
Soltústik Qazaqstan oblysynda qarttar men múgedekterge arnalǵan 4 qyzmet kórsetý ortalyǵy jáne «Nadejda» atty ınternat-úıi bar. Onda 756 adam turyp jatyr. Aılyq aıasynda Petropavl qalalyq Mádenıet úıiniń óner ujymdary osy ortalyqtarǵa baryp, kontsertter uıymdastyrdy, syılyqtar taratty.
Qalalyq ákimdikte arnaıy komıssııanyń birneshe otyrysy ótip, nátıjesinde otyn, kómir, dári-dármek pen kıim-keshekke aqsha suraǵandardyń ótinishi qanaǵattandyryldy. Bul maqsatqa mamandardyń esebinshe, 2 mln teńge jumsalǵan. Jalpy tek Petropavl qalasy boıynsha aktsııa aıasynda 43,2 myńnan asa adam qamtylyp, olarǵa 45 mln teńgeniń kómegi kórsetildi.
