Ottyq úshin tanysyn óltirip, denesin bólshektep tastaǵan aqtóbelikter sottaldy

AQTÓBE. KAZINFORM - Tanysyna ottyq úshin pyshaq suqqan Konstantın Panaskın 11 jylǵa, al onyń ólimin jasyrmaq bolǵan Mıhaıl Lýkın 4 jylǵa bas bostandyǵynan aıyryldy. 

Sotqa Alqabıler qatysty. Aqtóbe oblysynyń qylmystyq ister jónindegi mamandandyrylǵan aýdanaralyq sotynda qaralǵan iske úkim shyqty.

— Konstantın Panaskın Qylmystyq kodekstiń 99 baby 1 bóligimen aıypty dep tanyldy. Oǵan 11 jylǵa bas bostandyǵynan aıyrý jazasy taǵaıyndalsyn. Jazasyn óteý orny qaýipsizdigi ortasha mekemesi bolyp belgilensin. Mıhaıl Lýkın Qylmystyq kodekstiń 439 baby boıynsha aıypty dep tanyldy. Oǵan 4 jylǵa bas bostandyǵynan aıyrý jazasy taǵaıyndalsyn.

Sot-narkologııalyq saraptama qorytyndysyna súıensek, Lýkın men Panaskın psıhıkalyq aýrýǵa shaldyqqan. Іshimdikke táýeldi. Túzetý mekemesinde májbúrli túrde emdeý júrgizilsin, - dedi sýdıa Altynbek Sabyrov. 

Aıta keteıik, sot otyrysy kezinde K.Panaskın kinásin moıyndamady. 

Eske salsaq, 38 jáne 40 jastaǵy aıyptalýshylarǵa Qylmystyq kodekstiń «Adam óltirý» jáne «Qylmysty jasyryp qalý» baptary boıynsha aıyp taǵyldy.

Sottalýshylar men jábirlenýshi bir páterde ishimdik ishken. Sol jerde biri ottyqty tappaı, ony ekinshisinen kóredi. Sózge kelgen ekeýi ózara kelise almaı, biri ekinshisine pyshaq suǵyp alady. Jábirlenýshi oqıǵa ornynda kóz jumady. Al páter ıesiniń balasy Mıhaıl Lýkın bir kún ótken soń qylmysty jasyrmaq bolyp, deneni butarlaıdy. Aıaq-qolyn karerge tastap, denesin tońyzytqyshqa salady.